KYK VIDEO: Orania se eie bank, OSK vier 20 jaar se sukses

KYK VIDEO: Orania se eie bank, OSK vier 20 jaar se sukses

Orania se eie bank, OSK vier 20 jaar se sukses

OSK Koöperatiewe Bank Beperk (OSK) het in 2021 weer die Suid-Afrikaanse Reserwe Bank se prys vir die beste koöperatiewe bank in Suid-Afrika gewen!

Hierdie prys heet ‘Best performing cooperative bank’ en dit is die derde keer dat Orania se eie OSK hierdie prys verdien. Op Vrydag 18 Maart egter het OSK iets anders gevier: 20 jaar se bestaan. OSK het begin as ʼn goedhartige diens deur mnr Lucas Taljaard, wat in die pioniersjare van Orania werkers, wat nie na ʼn buitebank kon reis nie, se tjeks ingeneem het en aan hulle kontant uitbetaal het. Hy het dan self na buurdorpe gereis om die tjeks te wissel. Toe werkers oom Lucas begin vra om van die geld vir hulle te “spaar” sodat hulle dit verantwoordelik spandeer, het hy besef hy sou die proses moes formaliseer.

OSK het van krag tot krag gegaan deur strategiese beplanning, navorsing en insig op ‘n hoë standaard, betroubare personeel en Afrikanerinisiatief. Wat begin het as ʼn stokveldiens in Orania het in 2020 alreeds meer as ɸ230 000 000 se openbare kapitaalvorming in Orania gefasiliteer! Tydens die verjaardagvieringe, wat deur ongeveer 200 mense bygewoon is, het Hanri Maritz, die bankbestuurder, die Lucas-Taljaard-studiefonds amptelik bekendgestel. Dié fonds, wat in ʼn vorige nuusbrief gemeld is, het ten doel om behoeftige Orania-kinders ʼn geleentheid tot tersiêre studies te gee.

Nadat die berig in die Orania Bewegingnuusbrief verskyn het, was daar tussen kaartjieverkope en donasies reeds ɸ15 000 in die fonds! Hanri Maritz het aangekondig dat OSK die bedrag ora vir ora sal ewenaar, en daarna het die Orania Ontwikkelingsmaatskappy ook ɸ10 000 bygedra, wat OSK weer geëwenaar het. Ander sprekers by die geleentheid was dr John Strydom van die OSK direksie, en Lucas Taljaard wat OSK saam met sy eggenote, Frieda, begin het. Die uitvoerende hoofde van die Orania Beweging, Orania Dorpskantoor en Orania Ontwikkelingsmaatskappy het ook elkeen ʼn geleentheid gekry om hulle gelukwense oor te dra. Daarna is ʼn koek, wat ʼn presiese replika van die OSK gebou is, gesny. Baie geluk aan die personeel, direksie en bydraers tot OSK. Elke Oraniër wat ʼn rekening by OSK het, is ook ʼn aandeelhouer en al daardie bydraes het groot moontlikhede in Orania ontsluit.

Dra by tot die Lucas Taljaardstudiefonds: Kliek hier (verwysing: Studiefonds)

VIDEO:

 

Toets jou kennis! Orania Beweging se Stigtingsdagvasvra

Toets jou kennis! Orania Beweging se Stigtingsdagvasvra

TOETS JOU KENNIS!

Die Orania Beweging het op 6 April ons dorpenaars se kennis oor die VOC, Jan van Riebeeck, die Groot Trek, en Orania se stigting getoets as deel van die Stigtingsdagvieringe. Jy kan nou dieselfde vrae wat die deelnemers moes antwoord, rustig uit die gemak van jou huis doen en ook jou kennis toets!
Die deelnemers het ‘n tydsbeperking van 90sekondes gehad en moes op kamera antwoord, so die druk was hoog! Dalk is dit bietjie makliker in ‘n rustige omgewing.

Geniet dit, en deel gerus jou uitslae op ons Facebookblad!

 

Orania-atlete kook op die sportveld!

Orania-atlete kook op die sportveld!

Orania-atlete kook op die sportveld!

‘n Gesonde liggaam huisves ‘n gesonde gees en Oraniërs is kompeterend op verskeie vlakke en in verskillende sportsoorte. Terwyl die Orania CVO-skool se leerlinge 18 en 19 Maart gaan kompeteer het by die BCVO SA’s byeenkoms, het ander Oraniërs ook in verskillende sportsoorte deelgeneem.

Langasem: Christo Muller wen die 2022 CosmosChallenge

Die ‘CosmosChallenge’ is ‘n 46km bergterrein-wedloop naby Clarens. Rateltaai langafstandatlete sê mekaar die stryd aan oor twee dae (onderskeidelik 28 km en 18 km) waar hulle hoogte-toenames van 1180m+ moet trotseer en kompeterend moet hardloop bo kranse van 2200m bo seespieël! Christo Muller van Orania is die manswenner vir die langafstand wedloop, terwyl sy vrou Karin aan die korter (maar steeds baie uitdagende!) reisies deelgeneem het. Christo en Karin is ook voorvatters by die Orania Atletiekklub waar hulle tydtoetse, deelname en meer moontlik maak vir ander atlete.

Foto’s 1 en 2 Christo en Karin na afloop van die CosmossChallenge, en die terrein waarop hulle moes hardloop.


Jong Oraniër swem silwer- en bronsmedaljes los

Die jonge (o/11) Stephan Erasmus van Orania het ook die afgelope naweek presteer, maar in die water eerder as die berge. Stefan het aan Swem SA se byeenkoms in Sasolburg deelgeneem en op vlak 3 ‘n slivermedalje in die 50m borsslag (42.35s) losgeswem! Hy het ook brons verdien deur die 200m borsslag in 3:35.09 kaf te draf. Stefan se ma Helena is self ‘n kranige swemmer en het die Sandhaaie swemklub in Orania begin. Dié klub bied hoë gehalte afrigting, terwyl hulle besig is om die registrasieproses af te handel voor die volgende swemseisoen.

Foto’s: Stefan tydens opwarming, en na die swem.


Crossfit-atlete in Orania presteer in ope-toernooi

Die ‘Crossfit open’ is ‘n internasionale toernooi waar atlete van regoor die wêreld teen mekaar kan deelneem deur dieselfde oefeninge op dieselfde dag te doen en met prestasie in tye, repetisies of gewig kragte te meet.
Die uitslae word by die geaffilieerde sentrums bevestig, of deur ‘n onafhanklike skeidsregter per video beoordeel.
Orania se Gemsbok Sportinstituut het heelwat atlete ingeskryf vir hierdie kompetisie, en hulle het uitstekend presteer!
By die vroue het die veertienjarige Zincke Straszacker die 18de plek in haar ouderdomsgroep op die Afrika-kontinent verwerf in die ope kompetisie, terwyl Salumi Kriek in die afdeling vir 40-44 jarige vroue 54de in Afrika was. Tussen Orania en die Gemsbok se suster-gimnasium in Upington, Oryx, was Michelle Peens die atleet wat die beste gevaar het.
Onder die manne het die veertienjarige Hanro Maritz, seun van Hanri Maritz die voorsitter van die Orania Aandeleblok-direksie en bankbestuurder van Orania Spaar en Krediet, vir sy ouderdomsgroep die ses-dertigste posisie in Afrika ingeneem!

Foto’s: Hanro, Michelle en Salumi in aksie tydens die ope toernooi se wye verskeidenheid van oefeninge.

Foto onder, atlete hyg na asem na ‘n intense oefenrondte. 

   


Orania-studente kompeteer in universiteitsrugby

Twee van verledejaar se Orania-CVO skool matrieks en voormalige spanmaats, Sas van der Merwe en Wiehan Nel, het vroeg in Maart kragte gemeet (die keer teenmekaar!) tydens die NWU se eerstejaarskoshuisliga finaal. Sas en Wiehan speel onderskeidelik vir koshuise Veritas en Villagers. Wiehan se ouer broer WJ wat tans in sy derdejaar is, speel ook vir die universiteitsspan.

Ons is baie trots op al Orania se atlete!

Foto : Wiehan en Sas tydens die NWU eerstejaarskoshuisliga.

G’n meer skermtyd by voorskoolse sentrum in Orania nie: plaaslik gekomponeerde musiek nou die fokus

G’n meer skermtyd by voorskoolse sentrum in Orania nie: plaaslik gekomponeerde musiek nou die fokus

ʼn Dagsorgsentrum in Orania, Huppelkind, het onlangs die besluit geneem: Geen meer skerms en skermtyd nie!


Die besluit om die elektronika opsy te skuif, is reeds in 2021 prakties geïmplementeer en onlangs amptelike beleid geword. Volgens Esna Schumann, hoof van die instelling, spruit dit uit die erns wat Huppelkind maak met die pragtige musiek wat Cornelia Holm spesiaal vir Huppelkind komponeer en wat deel van die karakterontwikkelingprogram uitmaak. Dit, eerder as skermtyd, sal die fokus vir die kinders word.

Om na musiek te luister met die doel om die musiek en die taal te herken ontwikkel luistervaardigheid by kleuters reeds vroeg.
Kinders wat hierdie vaardigheid van ‘n vroeë ouderdom af inoefen en baasraak ervaar minder uitdagings wanneer dit by formele leer en lees kom.

“Om lekker buite te speel en te baljaar is tog veel beter én baie meer pret as om gedurig voor die televisie te sit.” Sê Esna, “Goeie opvoedkundige aktiwiteite wat fynspiere en denkvaardighede stimuleer is meer waardevol!”

Foto: ‘n Klas by Huppelkind Dagsorgsentrum na jaarvoltooiing

 

Optiese vesel internet in Orania: infrastruktuur word gekoppel

Optiese vesel internet in Orania: infrastruktuur word gekoppel

Optiese vesel internet in Orania:

infrastruktuur word gekoppel

Hoë spoed-internet is ʼn groot prioriteit vir die ontwikkeling van Orania, veral wat betref kenniswerkers en mense wat skaars vaardighede het of aanlyn entrepreneurs is. Vinnige internet is al vir ʼn rukkie in die pyplyn, en die Orania Dorpskantoor het vandeesweek ʼn groot stap geneem deur die hardelyn optiese vesel-koppeling te verbind met die nuutgeboude internettoring. Dit beteken verspreiding kan binnekort begin!
Die plaaslike verspreiding sal vir eers per mikrogolf geskied, terwyl ʼn optieseveselnetwerk plaaslik ontwikkel word.
Die Dorpskantoor, Stadsboufonds en ander rolspelers word gelukgewens met hulle harde werk en die groot stap vorentoe. Binnekort het Orania vinnige internet!

Foto onderDie nuwe 50-meter toring deur die Orania Dorpskantoor opgerig.
Foto heel onder: Die grond word geboor vir die lê van kabels, met eie-arbeid natuurlik!