MinderheidInEigenLandAfrikaners sê deesdae graag dat ons die verlede moet vergeet en moet leer om aan te beweeg en op die toekoms te fokus. Daar is egter genoeg rede om nie net alles wat agter ons is te vergeet en te maak asof daar niks uit ons verlede te leer is nie.

Een terrein waarop ons, maar ook ander Westerse volkere gerus uit die verlede kan leer, is dié van demografie. Daar was voorwaar ‘n tyd in ons verlede toe die Afrikaner gebiede beheer en regeer het waar ons toe nog ‘n meerderheid was.

Vandag is die Afrikaner bykans orals ‘n minderheid. Demografiese veranderinge weens die noodsaak vir goedkoop arbeid en die onvermoë om die grond wat ons besit het, volwaardig te kon regeer en beheer, het veroorsaak dat Afrikaners lank gelede reeds ‘n minderheid op hul eie grond geraak het.

In Europa sien ons vandag hoe etniese volkere in land na land besig is om as persentasie van die totale bevolking te krimp. Iin lande soos Frankryk, Nederland, België en Duitsland is Moslems reeds byna 10% van die totale bevolking. In Engeland het die Moslembevolking vanaf 2001 tot 2011 verdubbel. Ook in die VSA is daar ‘n enorme styging in die Moslembevolking. Die Pew Navorsingsentrum voorspel dat die huidige Moslembevolking in Amerika teen 2033 sal verdubbel. Dan is daar ook groot hoeveelhede nie-Moslems uit Afrika, die Midde-Ooste, Oos-Europa en Asië wat na Westerse lande immigreer, sommige op wettige wyses, miljoene ander egter op onwettige maniere. Onlangse navorsing in Oostenryk wys daarop dat 19% van dié land se bevolking immigrante of kinders van immigrante is en dat daar ‘n enorme toename in immigrasie uit lande soos Turkye is.

Hierdie groot bevolkingverskuiwing skep die vraag of Nederlanders ‘n minderheid in Nederland en Duitsers ‘n minderheid in Duitsland kan en gaan word. Die bekende Nederlandse politikus en vriend van die Afrikaner, Martin Bosma, het sopas ‘n opspraakwekkende boek oor hierdie tema bekendgestel. Sy boek, Minderheid in Eigen Land, behandel die Afrikaner se magsverlies in diepte en vra dan die vraag oor of etniese volkere in Europa dieselfde pad gaan stap. Ek het self die voorreg gehad om onlangs die bekendstelling van hierdie boek in Den Haag by te woon.

Bosma het vir meer as vyf jaar aan hierdie boek van meer as 500 bladsye gewerk. Dit is ‘n kragtoer van deeglike navorsing, sterk argumente en uiteindelik ‘n somber blik op die toekoms van die Westerse beskawing.

‘n Groot deel van sy boek word gewy aan die wyse waarop Westerlinge, en hier verwys hy veral na Nederlandse politici, kunstenaars en denkers, gedurende die vorige eeu teen die Afrikaner gewerk het. Volgens Bosma is die sterk ANC van die laat tagtigerjare ‘n skepsel van Westerse magte wat die Afrikaner wou ondergrawe. Soos wat die Afrikaner vandag deur ‘n meerderheid onder leiding van ‘n onvriendelike ANC regeer word, kan die vraag tereg gevra word of Nederland eendag deur ‘n Moslemmeerderheid beheer sal word.

Afrikaners en ander Westerse volkere sal vinnig hieruit moet leer indien ons nie maar net bloot minderhede op ons eie grond wil wees nie. Die lees van Martin Bosma se boek, is ‘n goeie vertrekpunt. Daarna moet daar ernstig oor konsentrasie, eie arbeid en ‘n nuwe identiteitsbewustheid onder ons mense besin word. Orania is tans ‘n ligpunt waar ons minstens gedeeltelik nie ‘n minderheid in ons eie land is nie.

Blog Single

Westerse minderhede in hul eie lande

by | Jun 10, 2015 | Nuus | 2 comments

2 Comments

  1. Ben

    Wel baie boere hier in die Vrystaat het eers 10 plaasarbeiders gehad en sit nou met slegs drie, wie se vroue nie meer op die plaas wil bly nie. Hulle werk hard en het lang dae.

    Reply
  2. Cornelia Holm

    Eie arbeid is die eerste stap na selfbeskikking vir minderhede. Maar ewe belangrik is om die media te beheer,om jou uitgangspunt en strewes onbevooroordeeld te kan oordra na jou belangegroep.

    Reply

Submit a Comment

Jou e-posadres sal nie gepubliseer word nie. Verpligte velde word met * aangedui

4 − 4 =