suicide-of-the-westDonald Trump, Amerikaanse presidentskandidaat, maak toe die voorstel dat geen Moslems verder in Amerika toegelaat moet word alvorens die land se immigrasiekrisis opgelos is nie. Trump se opmerking, wat skokgolwe deur die Amerikaanse politieke landskap gestuur het en koerantredakteurs van New York tot in Seattle in hul espresso’s laat stik het, volg op die massamoord twee weke gelede in San Bernardino waar veertien persone deur twee swaar gewapende Moslemekstremiste doodgeskiet is.

Die oplossing vir hierdie soort terroriste-aanvalle lê natuurlik nie in Trump se populistiese voorstel nie. In die meeste aanvalle deur Moslemterroriste in Westerse lande het die aanvallers in daardie land groot geword.

Charles Moore, skryf ʼn paar dae gelede in die Britse koerant, The Telegraph, dat die oorsaak vir ekstremisme juis in die die swak kulturele selfvertroue van Westerse leiers lê. In talle lande het leiers en instellings die afgelope paar dekades die Christelike karakter wat Westerse samelewings gesimboliseer het, uitgewis.

Die grootskaalse immigrasie van Moslems die afgelope twee tot drie dekades na Westerse lande is moontlik gemaak deur Westerse lande se oordrewe fokus op akkommodasie eerder as ʼn eie kultuurtrots en eis vir assimilasie van alle immigrante.

Moore skryf dat Moslemleiers in Engeland vandag daarop kan aandring dat geen Moslem in die Britse weermag teen ʼn Moslemland mag gaan veg nie. Moslembroederskap word deur Britse leiers beskerm, maar Christenbroederskap bestaan lankal nie meer nie.

Moore tref ʼn onderskeid tussen Islam as ʼn geloof en Islamisme wat ʼn ideologie is waarvolgens sekere tekste uit die Koran letterlik uitgevoer moet word en waarvolgens Islam tot ʼn politieke idee wat die wêreld moet regeer, uitgelig word. Die Islamisme word veral gedryf deur ekstremistiese leiers soos die Iranse Ajatolla. Terwyl Westerse lande nie ʼn werklike identiteitsalternatief vir Moslemimmigrante bied nie, kry die Islamisme ʼn voet in die deur.

Die Nederlandse skrywer, Gerry van der Lust skryf verlede week in die gesaghebbende nuustydskrif Elsevier, dat die liberale siening in Westerse lande dat alle mense gelyk is en dat daar verby grense en nasionaliteit gekyk moet word, nie regtig realiseer nie. Hy sê dat selfs in liberale Nederland mense gefokus sal wees op die dinge wat hul landgenote raak. Na ʼn vliegongeluk wil almal weet: Hoeveel Nederlanders was betrokke? Tans heers daar in Nederland ongelukkigheid met die groot bedrae geld wat op vlugtelinge spandeer word terwyl baie Nederlandse bejaardes swaarkry. Die omgee vir die eie is steeds sterk aanwesig, hoewel niemand dit mag erken nie.

Tog besef Westerse leiers nie watter krag daar in ʼn kultuurtrots kan lê nie. Net soos wat Islam nie Islamisme hoef te wees nie, hoef ʼn Duitse kultuurtrots nie tot ʼn nuwe Nazi-beweging te lei nie. ʼn Trots op die Christelike wortels van Westerse lande hoef ook nie tot die volgende kruistog te lei nie. Solank as wat Westerse leiers en instellings egter voortgaan om identiteit, grense en ʼn liefde vir die eie af te takel, terwyl Moslemimmigrasie op groot skaal toeneem, sal daar ʼn teelaarde vir ekstremisme aanwesig wees wat noodgedwonge tot baie meer soortgelyke terroriste-aanvalle as dié in San Bernardino in die VSA, sal lei.

Blog Single

Westerse kultuurtrots nou nodig

by | Des 15, 2015 | Nuus | 5 comments

5 Comments

  1. Dirk Breytenbach

    Geagte Jaco,

    Jou waarneminge oor kultuur trots is tekenend van die situasie onder Afrikaner geledere. Die geskiedenis is vol voorbeelde van ons politieke en sakeleiers wat wegskram van die feit dat hulle Afrikaners is met ‘n spesifieke kultuur en geskiedenis, so asof Afrikanerskap weggesteek moet word ter wille van oorlewing. Hierdie leiers en verskeie volksgenote word verder gekontamineer deur ‘n oorlewingsdrang wat gepaardgaan met politieke dienstigheid, kulturele hensoppery en self ontkenning omdat hulle nie in staat is om te sien dat hulle menswees en kultuur op die brandstapel geplaas is nie. Ek wil dit op rekord plaas dat ek nie ‘n “apartheidsopologeet” of “terugverlanger” na die verlede is nie, maar eerder realisties is oor die oorlewing van die Afrikaner as ‘n minderheidsgroep in SA en dat ek eienaarskap van my geskiedenis neem en bereid is om dit wat goed is uit die verlede te neem en daarop voort te bou. Daarom is dit belangrik om te weet of te besluit waar ons inpas in die geskiedenis en die toekoms. Liberale denkrigtings met betrekking tot identiteit en vrye keuses het dus nou veroorsaak dat Westerse lande tot die besef gekom het dat die agteroorbuig vir kulture en godsdienste wat radikaal teenoor hul eie sienings opereer ‘n doodloop pad is. Die oplossing vir die Moslem en ander migrasie kwessies is om te besef dat die vermenging van kulture en godsdienste ‘n resep vir wanorde is en dat dit omsigtig gehanteer moet word VOORDAT dit ‘n probleem word. My persoonlike siening is dat eie kultuur en volks identiteit gehandhaaf moet word om te verseker dat voordele uit diversiteit geput kan word eerder as om ‘n onhoudbare mengelmoes toe te laat wat in alle rigtings trek.

    Reply
    • revo, revas, revat

      Stem saam Dirk, vermenging het nog altyd ‘n gemors afgegee. ‘n Baie deeglike terugkeer na goeie waardes is dringend noodsaaklik.

      Innige groete

      revo! revas! revat!

      Ek kom! Jy kom! Hy/sy (dit) kom!

      Reply
  2. Ivor Davis

    Hi Dirk en Jaco. Stem! Baie goed gese. Groete Ivor.

    Reply
  3. Francois

    Die meerderheid wil van die Amerikaanse kiesers sal bepaal of Donald Trump president gaan word of nie. Ek self besluit nog of ek van hom hou as volgende president, want hy kom vir my partykeer ‘n bietjie TE selfversekerd voor maar aan die agterkant van my kop (seker my logika) hou ek van die waaghaalsigheid wat hy het om baie eerlik en openlik sy gevoelens te deel oor ‘n verskeidenheid van onderwerpe. Die vraag is of hy daadwerklik sal werk maak van die kwessies as hy eers president is.(Kyk hoeveel beloftes het Barack gemaak en meeste van sy beloftes het dadels van gekom). Ek vereenselwig my meer met die Republiekeine wat ‘n meer konserwatiewe benadering volg as die Demokrate wat meer links gesind is. Die demokrate onder Barack Obama sukkel juis aansienlik meer met rasse kwessies as wat die Republiekeine mee sou sukkel, aangesien die demokrate ‘n vermenging van en ge-forseerde integrasie oral wil opdwing en geen ruimte wil los vir individuele vryheid van kulturele assosiasie nie.

    Reply
  4. Simon

    En tog is die interessant:

    “That makes the finding of a new survey of Muslim voters particularly remarkable: Incredibly, he’s third in the race, and top among Republican contenders, according to a new study from the Council on American-Islamic Relations. About 7.5 percent of those surveyed said they support Trump—though that trails far behind Hillary Clinton (52 percent) and Bernie Sanders (22 percent).”

    http://www.theatlantic.com/politics/archive/2016/02/muslim-voters-2016/458691/

    Reply

Submit a Comment

Jou e-posadres sal nie gepubliseer word nie. Verpligte velde word met * aangedui

3 × two =