yes‘n Paar dae gelede het die Katalane in Spanje hul nasionale dag herdenk met groot steun vir onafhanklikheid. Stappe om Katalonië nader aan onafhanklikheid te bring sal waarskynlik binne die volgende paar maande geneem word. Later hierdie week sal die Skotte besluit of Skotland voortaan ‘n onafhanklike staat moet wees. In Suid-Tirool in Italië is die steun vir onafhanklikheid of ‘n herinlywing by Oostenryk die hoogste in dekades. Selfs in Texas in die VSA was daar die afgelope maande ‘n skerp styging in die steun vir sesessie. In België is die Nieuw-Vlaamse Alliantie, ‘n party wat ten gunste van selfbeskikking vir Vlaminge is, tans die grootste party in Vlaandere en ook in die hele België. Sesessie is nie meer ‘n tema wat deur randfigure en randorganisasies bespreek word nie. Die idee van onafhanklikheid vir streke en volkere wat begeer om uit territoriale state te breek en oor hulself te regeer begin ‘n algemene idee te raak.

Tydens ‘n konferensie van die libertariese Vereniging vir Eiendom en Vryheid wat die afgelope vyf dae in Turkye plaasgevind het, is die belang van selfbeskikking en sesessie keer op keer bespreek. Dié vereniging bevorder breë libertariese idees oor eiendomsreg en die vryheid van individue en gemeenskappe om oor hul eie sake te kan besluit. Meer as 100 akademici, sakelui en regskenners van regoor die wêreld woon jaarliks hierdie prestige konferensie by.

‘n Deurlopende tema by vanjaar se konferensie was die vraag oor die wenslikheid al dan nie van volkere om ‘n reg tot selfbeskikking te kan opeis. Spreker na spreker het hul steun vir  selfbeskikking en sesessie uitgespreek. Die motivering hiervoor lê juis in die probleem wat soveel minderhede regoor die wêreld beleef naamlik ‘n staat wat toenemend mag sentraliseer. Regerings plaas toenemend beperkinge op eiendomsreg en onderdruk, soms ongewustelik, sy onderdane deur diskriminerende wetgewing insluitende wetgewing teen diskriminasie en wetgewing wat sukses belas en afhanklikheid aanmoedig. Die libertariese antwoord hierop is dat alles moontlik gedoen moet word om sentrale regerings te verswak. Slegs dan sal gewone burgers die vermoë herwin om groter seggingskap oor hul eie lot te herwin. Meer en kleiner regerings beteken dus meer vryheid vir burgers en beloon prestasie terwyl groter en magtiger regerings toenemend vryhede moet inperk en prestasie eerder belas.

Carel Boshoff, president van die Orania Beweging, was vanjaar een van die 17 sprekers by die Vereniging vir Eiendom en Vryheid se konferensie. Die idee van Afrikaners wat net soos die Skotte, Katalane, Vlaminge en Suid-Tirolers beheer oor hul eie lot by die sentrale regering wil wegneem en na hul eie gemeenskappe afwentel, is baie positief ontvang.

Daar was egter ook waarskuwings. Afrikaners wat na selfbeskikking strewe moenie in die slaggat trap om een gulsige regering met ‘n ander te wil vervang nie. Ons historiese fokus op die staatlike het ons keer op keer in moeilikheid laat beland. Afgewentelde besluitnemingsvermoëns of regering is die korrekte model. Ons sal ons strewe egter op die regte beginsels naamlik hoë morele waardes, persoonlike vryheid, die vryemark en vryheid van assosiasie of disassosiasie moet maak. Dan sal ons ook aktief kan deel word van die internasionale beweging van volkere wat na vryheid strewe.

Blog Single

Selfbeskikking word toenemend ‘n hoofstroomidee

by | Sep 16, 2014 | Nuus | 2 comments

2 Comments

  1. RG

    “Afrikaners wat na selfbeskikking strewe moenie in die slaggat trap om een gulsige regering met ‘n ander te wil vervang nie”

    Dit kon nie beter opgesom word as dit nie. Terwyl ander nasies by hul regering se voete huil vir vryheid en selfbsekikking, is Orania ‘n praktiese bloudruk vir dit en doen waar ander droom.

    Ek sien ‘n tyd kom waar Afrikaners hul self regeer onder die Afrika son en hul eie toekoms bepaal.

    As jy glo dit sal nooit gebeur nie doen my ‘n guns, daar waar jy voor jou rekenaar sit. Kyk na jou hande… Die bloed in daai are kom van voorouers wat getrek het na die gatkant van Afrika. En toe hulle hier kom? Geniet hulle hul westerse hospitale, skole, paaie, kuns/kultuur ens? NEE! Hier was niks! Jy kan nie vandag vir my se dat net ‘n ou gewone mens van daai tyd op ‘n skip gespring het en die donkerste onbekende kon ingeruis het nie. Het jy dan vergeet? Nie eers die britse mag kon ons hier verwyder nie. Dieselfde mag wat daai tyd oor meeste van die wereldse lande gestoomroller het.

    En nog steeds lyk jy nog so bietjie onseker?
    Het jy dan vergeet wie jy is?

    Reply
  2. Jaap Taljaard

    Ek is gelukkig en dankbaar dat ek van die ouer garde is wat nog kan onthou maar steeds daagliks foos gemoker word met African National Congress Black Majority Rule propaganda. Wat van ons onskuldige Afrikaner jongmense wat onder uiters swak omstandighede noodgedwonge in Suid Afrika in staatskole ingedwing word? Is hierdie jong Afrikaners bestand teen propaganda wat ‘n ganse mensdom oortuig het dat hulle vootrgeslagte die skuldiges is en selfs bloed aan hulle hande het? Kom ons begin net hier, op eie bodem, met ons bekendstellingsveldtog en maak so seker dat hulle nie verlore en vervreemd raak van ons volk, ons kultuur, ons geskiedenis en ons geloof in die Almagtige nie. Hy sal voorsien en ons is teenoor Hom alleen verantwoordelik en verseker nie die regering van die dag nie!

    Reply

Submit a Comment

Jou e-posadres sal nie gepubliseer word nie. Verpligte velde word met * aangedui

18 − ten =