electricityBehuising is seker die grootste onmiddellike behoefte vir Orania, en dit al vir ‘n geruime tyd. Die algemene sentiment onder talle inwoners en ondersteuners is dat meer huise gebou moet word en dit word verwag dat die Orania Dorpsraad en Orania Beweging dit moet doen. Wat egter dikwels vergeet word is dat ons nie net sommer links en regs huise kan bou nie, selfs al was ons fondse van so ‘n aard, sonder die nodige grondwerk nie. Voor ‘n huis gebou kan word moet die infrastruktuur eers daar wees. Daar is goeie konsepte soos die aardskip wat sy eie water, krag en riolering voorsien, of Sonpark met sy sonkraggedrewe vraghouerhuise, maar die meerderheid mense soek standaardhuise met munisipale dienste.

Orania Dorpsraad is tans besig om die hele kragnetwerk van Orania op te gradeer en na ‘n volgende fase te neem. Die huidige harde infrastruktuur (met ander woorde die kragnetwerk, rioolplase, waterpypleidings) dateer grootliks nog uit die 1960’s en het hulle leeftyd bereik. Die kragbehoefte vir Orania word ook al hoe meer weens nuwe uitbreidings. Daarom is daar met `n opgradering van die kragnetwerk begin wat nuwe kapasiteit beskikbaar stel. Die opgraderings van die kragnetwerk is 90% afgehandel en die uiteindelike koste beloop tien miljoen Rand wat vir ‘n klein gemeenskap soos Orania nogal ‘n taamlike bedrag is. Dit is egter ‘n noodsaaklike uitgawe wat nodig is om die grondslag vir die volgende fase van groei te lê.

Die opgraderings behels dat ‘n nuwe substasie as toevoerpunt gebou word en nuwe kraglyne, wat hoofsaaklik ondergronds gelê sal word. Tans het Orania twee lyne, ‘n landboulyn en ‘n dorpslyn. Hulle sal met mekaar verbind word en in die toekoms een lyn vorm. Die omskakeling van hoogspanning vanaf Eskom (22 000 volt) geskied tans in twee stappe: deur middel van transformators, eers na 3300 volt en dan na 220 volt op huishoudelike vlak. Met die opgradering word die tussenstap na 3300 volt uitgeskakel en die krag direk na 220 volt omgesit. Dit alles bring besparings en groter doeltreffendheid mee.

Vir die dorp en sy inwoners het die opgradering direkte voordele. Dit sal besparings meebring (na beraming sowat 5%), die moontlikheid van onderbrekings word verlaag deur die daarstel van `n meer betroubare kragtoevoer en deur die verhoogde kapasiteit is groter uitbreidings in die toekoms moontlik. Daar is reeds 18 nuwe erwe in Kleingeluk uitgesit wat tans gediens word, en naby die Dorpskantoor is nog erwe  in beplanning.

Verder word Orania se ideaal van groter selfstandigheid deur die opgraderings moontlik gemaak. Alhoewel dit nog steeds Eskom se aansluiting bly, bestaan die moontlikheid nou dat Orania sy eie krag, ten minste gedeeltelik, kan opwek en in die stelsel vir sy eie behoefte kan insit. Tans is daar reeds ‘n eksperimentele sonkragafdak wat aan die stelsel gekoppel is. Indien dit suksesvol is bestaan die moontlikheid van ‘n groter sonkragaanleg vir Orania. Dit sal egter deur private inisiatief gedoen word deur mense in Orania of met ‘n Orania-verbintenis.

Blog Single

Opgradering van elektrisiteitsnetwerk skep grondslag vir nuwe groei

by | Des 8, 2014 | Nuus | 9 comments

9 Comments

  1. Anthony

    Groter selfstandigheid, en later algehele selfstandigheid, is sleutel vir my…

    Reply
    • Pieter

      Die huidige Kragstasies is so verinneweer met swak instandhouding en onbevoegdheid,dat al word daar nog nuwe stasies gebou, gaan dit nog baie jare neem om weer n goeie infrastruktuur daar te stel.Daaraan gekoppel die planne om duisende HOP huise te bou. Praat nie eers van ander projekte nie. Al gedink of die huidige infrastruktuur asook die uitbreidings dit kan en gaan hanteer? Die oplossing gaan beslis groter aanwending van sonkrag en of windkrag wees.Die algemene gevoel is dat dit baie duur is om sonkrag te installeer. Dit is tans wel so maar getalle veroorsaak kompetisie en dwing pryse af.

      Reply
  2. Oom Ref

    Mooi so, Sebastiaan! Die geheim bly pro-aktiewe optrede met die effektiewe aanwending van beskiikbare fondse. Die idee is sekerlik om so gou as moontlik onafhanklik van die nasionale voorsienings-netwerk te word. Sterkte daarmee.

    Innige groete, oom ref.

    Reply
  3. Lavre

    Dit bly net lekker om te lees hoe julle uitbrei en verbeter. Dit help my ook om al die “Pyn-in-die-g*t” negatiewe aanmerkings en snedige “wyshede”, wat ek baie gereeld kry as ek oor Orania praat, te verduur. Want ek WEET Orania SAL werk, en GAAN ‘n kleine “Monako” word, in hierdie land wat alles gehad het.. Ek wens net dit kan vinniger gebeur – saam met onafhanklikheid.

    Reply
  4. Theuns

    Met Eskom wat in totale chaos is, is dit uiters bevraagtekenbaar of enige uitbreiding vanaf ‘n onbetroubare bron enigsins as vooruitgang gesien kan word…onafhanklike kragvoorsineing sonder Eskom is die werklike uitdaging.
    Die uitdaging is duidelik nie opgeneem nie///sien nie voordeel buiten meer huise wat van Eskom afhanklik is nie.
    Privaat- wat Orania mos is- ontwikkelings kyk na eie generators, sonkrag, windkrag, gas ens. NIE na Eskom nie. Iets klop nie met die “positiewe” boodskappie……

    Reply
    • Jaco Kleynhans

      Theuns,

      Jy is hier ook heeltemal verkeerd. Die eerste stap na onafhanklike energieverskaffing in Orania moes begin met ‘n sterk interne netwerk. Ons netwerk was verouderd en soos wat die dorp uitgebrei het aangelap en ondoeltreffend. Ons het nou ‘n effektiewe interne verspreidingsnetwerk wat direk aan ons eie substasie koppel. Voorheen het die dorp op twee verskillende punte krag by Eskom getap. Met die ou netwerk sou dit onmoontlik gewees het om elektrisiteit terug in die netwerk te plaas. Met die nuwe meer geslote stelsel is dit moontlik. Die Orania Dorpsraad onderhandel tans met twee plaaslike entrepreneurs wat sonkragstasies hier wil bou. Intussen het die Dorpsraad ook ‘n klein sonaanleg by sy kantoor gebou wat reeds elektrisiteit in die netwerk terugplaas. Hierdie projek dien as proeflopie vir verdere ontwikkeling. Ons glo Orania sal binne die volgende paar jaar deur die gebruik van alternatiewe energie in ‘n groot deel van sy eie energiebehoefte kan voorsien. Verder het die Orania Dorpsraad ook ‘n houding om huishoudings en besighede aan te moedig om self na sonkrag oor te skakel. Dit is maklik om te kritiseer en moeiliker om te bou. Ons verkies om te bou en om op ‘n volhoubare wyse ‘n werklike oplossing vir ons mense te skep.

      Reply
      • Theuns

        Jaco ek dink jy som dit alles pragtig op. Almal se opninies is verkeerd indien dit nie dieselfde is as die van die skrywer nie. Leef en laat leef. Kyk wyer. Sterkte.

        Reply
    • Sebastiaan

      Theuns, ek stem saam dat die ideal moet wees om heeltemal onafhanklik van Eskom te wees. Met ons beperkte fondse kan ons ongelukkig net tree vir tree en in fases van groter selfstandigheid vorder. As ons biljoene tot ons beskikking gehad het, en polities total onafhanklik was, kon ons a la Doebai tegniese wonderwerke sommer vinnig geskep het. Ek wil graag energieonafhanklikheid vir Orania sien, en dalk moes ons al jare gelede begin het om daaraan te werk, maar ons moet prioriteite stel. As ons ‘n eie kragstasie bou, kan ons nie huise bou of grond aankoop nie, en dis net so belangrik. Gelukkig sink Suid-Afrika nie soos ‘n klip nie, maar eerder soos ‘n skip, dus kan ons dinge nog in plek kry. Eskom is op pad uit, maar sal nie sommer binne maande tot stilstand kom nie. Eie kragvoorsiening is nou prioriteit. Die verantwoordelikheid lê egter nie net by die instansies nie, maar by elke inwoner, deur self krag te spaar en alternatiewe in plek te kry soos songeysers en sonpanele.

      Reply
  5. Theuns

    Ek ondersteun Sebastiaan se benadering ten volle. Sterkte.

    Reply

Submit a Comment

Jou e-posadres sal nie gepubliseer word nie. Verpligte velde word met * aangedui

10 + five =