FAKDaar is ʼn ou sêding dat die geskiedenis deur die oorwinnaars geskryf word. Die afgelope twintig jaar tree die ANC-regering ook soos oorwinnaars op deurdat Suid-Afrika se geskiedenis herskryf word op maniere wat Afrikaners soos Nazi-monsters laat lyk en wat ʼn skeefgetrekte beeld oor ons land se geskiedenis aan kinders oordra.

Die Federasie vir Afrikaanse Kultuurverenigings, die FAK, se verslag wat onlangs hieroor bekend gemaak is, is dus besonder belangrik. In hierdie omvattende verslag word uitgewys hoe daar in skoolhandboeke ʼn weergawe van Suid-Afrika se geskiedenis gegee word wat nie met die waarheid kers vas hou nie.

Daar word onder andere in handboeke geskryf dat Jan van Riebeeck en die Nederlanders die vrede en harmonie wat in Suid-Afrika geheers het, kom versteur het. Enigiemand wat al ʼn paar geskiedenisboeke oor die konflik tussen Suid-Afrika se vroeë bewoners gelees het, sal weet dat hierdie opmerking totale onsin is.

Die probleem met geskiedenis is dat dit baie keer nogal op ongemaklike maniere van die populêre denke verskil. Neem nou maar vir Nelson Mandela as voorbeeld. Hy verdien sekerlik krediet vir baie dinge wat hy in sy lewe reggekry het. Hy het egter ook foute gemaak. Geskiedenisboeke behoort Mandela se goeie en slegte sy uit te beeld en nie van hom ʼn soort onaantasbare heldefiguur te maak nie. Die redes waarom Mandela voor die hof gedaag en in die tronk gestop is behoort ook in vandag se geskiedenisboeke gepubliseer te word.

Een belangrike instrument in die skep van ʼn balans tussen die propaganda van die meerderheid en die waarheid oor ʼn minderheid se geskiedenis, is die media. Dit is daarom uiters kommerwekkend dat Pieter du Toit, nuusredakteur van die Afrikaanse dagblad, Beeld, vroeër hierdie week ʼn genadelose, bykans emosionele, aanval op die FAK-verslag gelewer het. Du Toit verkleineer die leierskap van die FAK en gaan sover om Afrikaners met Nazi-Duitsland te vergelyk in sy regverdiging van die ANC se projek om ons geskiedenis te kriminaliseer.

Hierdie soort van anti-Afrikaner retoriek word gereeld in Beeld en ander Naspers-koerante gevind. Die rubriekskrywer Henry Jeffreys het ook ʼn tyd gelede in Beeld geskryf dat Apartheid net so sleg soos die Nazi’s se volksmoord op die Jode in Duitsland was. Die werklikheid is egter dat meer as 10 miljoen mense, hoofsaaklik Jode, deur die Nazi’s uitgewis is. Minder as 5000 mense is deur die Apartheidsregering vermoor.

Afrikaners moenie probeer om die foute in ons eie verlede te regverdig nie. Ons het egter ʼn reg daarop om seker te maak dat ons kinders in skole aan ʼn billike weergawe van ons geskiedenis blootgestel word. Geskiedenishandboeke speel hier ʼn belangrike rol en dit is daarom belangrik dat instellings soos die FAK ʼn waghondrol moet speel om seker te maak dat ANC-propaganda nie as feitelike waarhede aan ons kinders oorgedra word nie.

7 Comments

  1. Hanno

    Dit verstom my al jare dat selfs Afriforum bly swyg oor die toenemende stroom blatante SABC-TV leuen-propagandaprogramme sedert 1994.

    Reply
    • Jaco Kleynhans

      Nie waar nie. Hulle is ook baie bekommerd oor die SABC se swak en verkeerde beriggewing.

      Reply
      • Hanno

        Nie waar nie? Geen Afrikaanse instansie het binne my wete die afgelope twee dekades op openbare media standpunt ingeneem teen die weeklikse ANC-SABC-TV verdraaide geskiedenis propagandaprogramme nie.

        Reply
        • Johan

          Stem saam met jou Hanno. Om bekommerd te wees en daadwerklik op te tree is nie dieselfde ding nie!

          Reply
  2. Morne Pitout

    Die vraag wat ek myself konstant afvra, is moet ons moeite doen en energie verbruik om iets daaraan te doen, onsself opwerk of moet ons dit eenvoudig op die ken vat? Persoonlik glo ek vat dit op die ken, en kyk vorentoe. Bou Orania. Bemark Orania. Bemark onsself, ons moontlikhede, ons vaardighede. Werk met ander gemeenskappe. Help hulle, kry hulle aan jou kant. Bou momentum en moenie opgewerk raak deur “Pietie” du Toit se artikel nie. Ook nie wat die regering kwyt raak nie. Ek sal sê wees eerder paraat oor die toekoms – ons bou ‘n nuwe toekoms vandag, niewaar, en ons moet seker maak dit kan nie weer van ons weggeneem word nie. Ons wil dit nie weer verloor nie. Hierdie is die laaste bushalte. Ons skryf nou ‘n nuwe “geskiedenis”. Ons moet gefokus wees en bly. Die SAUK, media en hulle dissipels maak ons fokus verloor. Moenie val daarvoor nie en bewys hulle verkeerd. Dis tenminste wat Duitsland reggekry het.

    Reply
    • Hanno

      Wesenlike leuens deur wesenlike aardse instansies en persone mag nooit ignoreer en dus effektief aanvaar word nie. In hierdie eindtyd neem misleiding op alle vlakke dramaties toe. Ons is moreel verplig om dit teen te staan.

      Reply
  3. Sebastiaan Biehl

    Morne, ek stem saam dat ons nie in agterhoedgevegte betrokke moet raak nie en dat Orania se primêre taak die bou van ‘n nuwe toekoms is. Dit is egter goed dat daar organisasies soos die FAK is wat opkom vir die Afrikaner se geskiedenis. Ons moet nooit die verlammende effek van self-haat of skaamte vir jou verlede onderskat nie. Afrikaners wat skaam is vir hulle geskiedenis sal maklik wil integreer of emigreer om die gewaande skandvlek van hulle verlede te ontkom en beslis nie by Orania betrokke raak nie. Trotse Afrikaners daarteenoor sien dat Orania ‘n projek is om die Afrikaner weer ‘n trotse en vrye volk te maak, hoe klein ons poging ook al op hierdie stadium nog is. Of Duitsland ‘n voorbeeld is, is ek nie so seker oor. Inderdaad was daar ‘n geweldige ekonomiese oplewing in die 1950’s en 1960’s juis omdat mense vorentoe gekyk het. Hulle het egter nie hulle trots en identiteit verloor nie. Dit het eintlik eers in die 1970’s begin, die afkraak van alles in die verlede, ook dit voor die Nazi-verskrikking. Dit hou ook nie op nie maar word al hoe veller, en is meesal tuisgemaak. Duitsland is nog steeds ekonomies voorspoedig, maar het sy siel verloor omdat amper niemand opkom vir die lang geskiedenis nie, en radikale studente sonder diepte met hulle Twitter en Facebook “shitstorms” die debat oorheers.

    Reply

Submit a Comment

Jou e-posadres sal nie gepubliseer word nie.

17 − 8 =