Tainted

Die vliegtuigkaptein kondig aan dat ons gereed is om op te styg… Gewoonlik is dit die tyd wat ek in benoudheid ‘n vinnige skietgebedjie opsê. Tog is ek nie vandag benoud nie. Ek kan nie wag om weg te kom nie.

Gisteraand het ek die voorreg gehad om die première van Forum Films se nuwe dokumentêr Tainted Heroes te sien. Hierdie film vertel die ander kant van die geskiedenis van Suid-Afrika se sogenaamde “struggle” en die gepaardgaande “people’s war” waartydens 25 000 mense wreedaardig moes sterf as gevolg van die gierigheid en magsbeheptheid van die ANC leierskap van daardie tyd. Tydens die dokumentêr vertel slagoffers hulle verhale. Oom Naas van Eck vertel hoe hy en sy gesin op hul plaas in Messina deur ‘n landmyn opgeblaas is. Hy vertel hoe hy tot vandag toe nie sy 3 jarige seuntjie se lyk gevind het nie. Volgende verskyn die ANC se voormalige hoof van MK, Siphiwe Nyanda op die skerm en vertel hoe die ANC besluit het dat dit aanvaarbaar is om boere en hul gesinne op plase op te blaas, vermoor en te vermink. Boere is as die vyand gesien.

Die vliegtuig styg op en ‘n gevoel van vryheid spoel oor my. Ek kyk by die venster uit en sien ‘n slagveld van ontwikkeling en rykdom. Ek verwonder my aan die armoede van die ryk stadsbewoners. Ek dink aan Orania en voel nederig. 1200 inwoners. Daar was gisteraand amper so baie mense by die vertoning van Tainted Heroes. Almal was daar. Politici, akademici, filosowe en teoloë. Leiers en leiers van leiers. Daar was goeie vriende en kennisse van jare gelede, maar ek kon die ongemak nie afskud nie. Waarom voel ek nie tuis nie?

Die vliegtuig styg hoër en hoër terwyl die stad kleiner en al hoe vêrder onder my wegraak. Daardie vreemde plek waar ek gebore is en 15 jaar van my lewe spandeer het. Ons raak die wolke en in ‘n oogwink is ons in ‘n ander dimensie. Die harde realiteit van Tainted Heroes, die stad en Suid-Afrika het op slag verdwyn. La-La land. In hierdie vreemde droomwêreld tussen die wolke begin die skrille kontras tussen my vertrekpunt en my bestemming dieper as tevore insink.

Orania is nie groot nie. Orania is nie gemaklik nie. Orania is nie ryk nie. Orania is ook `n deel van die jaar nie baie mooi nie wanneer die harde winter sy oggendryp bring. Dit is soms bitter koud en ander tye bloedig warm. Tans is Orania vaal en droog weens `n gebrek aan goeie reën.  Nou waarom verlaat ek hierdie groot gemaklike en beeldskone rykdom met ‘n jubel in my hart en verlang ek na my stofdorpie in die woestyn?

In Orania woon daar 1200 mense wat gekies het om hul grootheid, skoonheid, gerief en rykdom anders te definieer. Ja, ons het geoffer om Oraniërs te wees, maar sodra mens die vrugte van ’n gesonde gemeenskap met ’n begronde waardestelsel begin proe verander alles. Ek verlang na hierdie mense. Na my hardkoppige, gromgat buurmanne en buurvroue wat dink en doen soos ek.

Ja, Orania is nie die hemel nie. Dit sê ons gereeld vir mekaar. Soms skinder ons. Soms verskil ons en veg ons. Soms is ons onredelik met mekaar. Ons het 12 kerke en twee skole. Ons het uiteenlopende politieke oortuigings. Tog, anders as in hierdie bose ou stad, ken ons mekaar. Dra ons mekaar. Ondersteun ons mekaar. Ons vryheidsideaal snoer ons inderdaad saam. Ons bly mekaar se grootste bate.

In Tainted Heroes het ek gesien hoe Afrikaners alles verloor het. In Pretoria en Johannesburg het ek gesien hoe groot rykdom en tyd bestee word om water uit ‘n sinkende skip te skep. Wat nou?

Ek ry oor die Oranjerivier, draai links by die kuslyn van verganklikheid en ry die laaste 40 kilometer “volkstaat” toe. Voor my verskyn Orania se koppie in die vêrte en ek besef dat ek dankbaar deel is van Orania en ons groot drome vir die toekoms. Oraniërs, ons moenie perspektief verloor nie. Ons is die laaste kans vir Afrikaners in Afrika. Ons dra ’n reuse verantwoordelikheid op ons skouers. Ons is ook bevoorreg om in die grootste, rykste, gerieflikste en mooiste gemeenskap in Suid-Afrika te woon. Aan hierdie kant van La-La land word waarde nie in geld, getalle en die materiële gemeet nie!

Aan alle Afrikaners vêr en wyd, dink na oor dit waarmee jy besig is. Dink oor jou toekoms. Dink oor jou plek in die wêreld en in Suid-Afrika. Dink oor jou rykdom. Dink oor jou geld. Dink oor jou lewensgehalte en veiligheid.

Dink die langste aan ONS vryheid, ONS toekoms, ONS nageslag en JOU verantwoordelikheid om dit te verwesenlik.

Sal ons antwoord op die roepstem? Sal ons offer wat dit vra? Sal ons lewe en sal ons sterwe vir ons vrye toekoms in Afrika?

 

Blog Single

Aan die anderkant van La-La land

by | Feb 4, 2016 | Nuus | 13 comments

13 Comments

  1. Chris de Witt

    Hi ,…
    My kop staan al lankal die kant toe , maar nie almal het die fondse om sommer net jou penne uit te trek waar jy is en jou tent op n ander plek te gaan opslaan nie , maar dis die uitsluitlike plan , ek is n boer , my vel is wit , my geloof is suiwer , en my kultuur is deur n Hoër Hand in my weggelê , en ek kan nie sien hoe ek lank meer in die duiwelse gemors moet leef nie , ja nee , Orania sal my sien !!!

    Reply
  2. Ben le Roux

    Die PAC se son het in Ghana kop opgetel! Ons SON tel in Orania kop op!

    Reply
  3. Marieta Voges

    Dankie vir die artikel Sarel, dit laat ons nog meer seker voel dat ons die regte besluit geneem het om deel te word van Orania…Nie meer lank nie, dan is ons DV daar!

    Reply
  4. Ester le Roux

    Dit ráák diep. Pragtige artikel.

    Reply
  5. Robert Mc Kinnon

    Ek was in Desember 2015 in Orania. Ek wens ek kon daar bly. Sodra Orania die 5000 mens merk beteik dan sal ek n lewe daar kan maak
    . Goeie artikel.

    Reply
    • Sebastiaan

      Ons wil graag hê meer mense moet kom om meer geleenthede te skep. Daarom wil ons die klein stad Orania bou. Die wat nie nou al kan kom nie kan wel aansluit by die Orania Beweging en geleenthede vir die skep wat nou reeds kan kom.

      Reply
  6. Jean van Jaarsveld

    Ek stem! Pragtige artikel! Ek en my gesin oppad, want ons kom help bou aan die Mooie Orania!

    Reply
  7. Peter Hart

    My hart het alreeds van Kanada na Orania immigreer. Ek volg een van hierdie dae want Orania is die enigste en laaste tuiste in die hele wereld vir die Afrikaner. Net soos die Jood weet Israel die enigste en laaste tuiste is vir die Jood. Dit is hoekom dit van kulteer lewens belang is dat alle Afrikaners in die wereld Orania bystaan. Afrikaner waar u ook al woon is u die lewensbloed van Orania. Eendrag maak mag.

    Reply
  8. Andries Maritz

    Baie mooi geskrywe Sarel en dit is verblydend dat Orania sterk aangaan en ek weet dit sal vorentoe net verbeter.
    Soos jy noem, verrig almal op Orania ‘n BAIE gelangrike rol om die opofferings te maak om Afrikanerdom te behou.

    Dankie daarvoor & spesiale groete aan Carel,jouself en amal anders.
    Andries uit New Zealand.

    Reply
  9. Elli Meyer

    La-la Land se slapenstyd begin vanaf 9uur die aand In aanloop staan ons verstom oor die sonsondergang deur die pragtigste Chinese Populiere en groen mielielande. Na die dag se doen en late word daar tyd gemaak vir buite sit en stil word, hoor net die getjirp van voëls en woorde is onnodig, want elkeen het ‘n gedagtegang van dankbaarheid om in ‘n vrye staat te bly, by ons eie mense en vars water te drink. Kyk op na die sterrehemel en dank GOD waarheen HY ons gebring het, vrede, vars lug, vriende en vryheid om onsself te wees.

    Reply
  10. Hanno

    Ai, vir diegene wat bevoorreg is met die gawes om ‘n heenkome te vind in ‘n klein gemeenskap. Die res van ons kan nog net daarin deel he deur in Orania te bele.

    Julle is ons trots daar in Orania. Hoop om hierdie jaar weer ‘n draai daar te maak.

    Reply
  11. Thuunda

    Goeie skrywe, is diep geraak en aangespreek!

    Reply
  12. Riaan

    As uitgewekene wat reeds talle jare in die VSA woon stem ek met Peter Hart se opmerking hier bo saam. Ons emosionele band is met SA verbreek maar stewig met Orania gevestig. Orania is ons hoop vir n vrye Afrikaner eendag.

    Reply

Submit a Comment

Jou e-posadres sal nie gepubliseer word nie. Verpligte velde word met * aangedui

5 + seven =