Water in die woestyn: Orania se waterskema
Orania, in hierdie droë Karoo en semi-woestyn gebied, is afhanklik van die Oranjerivier vir sy water. In die jaar 1996 het ʼn groepie Orania-pioniers die verantwoordelikheid opgeneem om ʼn pyplyn te vestig – ʼn sisteem wat water al die pad van die rivier tot by landerye en boorde kan vervoer.
Die Orania Beweging het in ‘n vorige nuusbrief berig oor hierdie waterskema-inisiatief. Ons deel graag ‘n video wat hierdie verhaal verder vertel.
In Orania se vroeë bestaansjare het hierdie gebied heelwat anders gelyk as wat dit vandag lyk. Die dorp is in 1991 gekoop as ʼn “spookdorp”. Verlate strate en vervalle geboue het die nuwe intrekkers ingewag. In daardie dae het Orania baie nader aan ʼn woestyndorp gelyk as na die groen oase wat vandag bo die dorre veld uitblink.
Vir Orania om sy groen baadjie aan te trek, was water nodig. Meer spesifiek, die verspreiding van water wat uit die Oranjerivier gepomp kon word. Voor die pyplyn gevestig is, het sommige vroeë inwoners selfs water met bakkies en lorries aangery van die rivier af om hul tuine nat te spuit.
Eindelik het ʼn groepie pioniers die lyn getrek en besluit dat ʼn omvattende pyplyn gevestig moet word. Hierdie sou een van Orania se grootste projekte sedert sy bestaan wees – ʼn projek wat Orania se beginsels van eie arbeid, selfwerksaamheid en gemeenskap tot die uiterste sou toets.
Wat was die gevolg van hierdie projek? Was daardie pioniers beginselvas en het hul slegs eie arbeid gebruik om dié reusagtige taak aan te pak?
Kyk hierdie video wat die hele verhaal van een van Orania se grootste projekte vertel:
