Oudpresident Thabo Mbeki het onlangs ‘n artikel geskryf wat op sy Facebookblad en deur die Sunday Times-koerantgroep gepubliseer is. Daarin verdedig hy sy presidentskap en hy voer aan dat mense wat nouer betrokke was by die gebeure meer moet skryf sodat die geskiedenis nie alleen deur kommentators wat verwyder was van die gebeure beskryf moet word nie.

Oorwinnaars

Die sin in sy skrywe wat my die meeste opgeval het was die volgende: “It was inevitable that the whole process which led to the defeat of the white minority regime in our country, and the aftermath of this, would have their own historians, each with his or her political or ideological orientation.

Ek beklemtoon hier die woord “defeat”, omdat die verslaning van iemand iets heel anders beteken as woorde soos “onderhandelde skikking”, “kompromie” en “magsdeling.” Hierdie kan dalk vir u as ‘n skok kom, maar indien die gematigde en belese Mbeki glo dat ons as wit minderheid oorwin is, dan kan ek u waarborg dat die res van die ANC en die swart meerderheid dit ook glo.

Blankes in die algemeen sal egter vinnig uitwys dat ons as voormalige politieke magshebbers nooit op die oorlogsveld verslaan is nie en dat ons vrywillig aan die Nasionale Party ‘n mandaat gegee het om met die ANC te onderhandel vir ‘n nuwe Suid-Afrika wat aan almal beter geleenthede sou bied.

Tog is ek verplig om koue water op hierdie argument te gooi. Indien ons nie op die oorlogsveld verslaan is nie, is ons beslis by die onderhandelingstafel verslaan. As u my nie glo nie vra ek graag: Wie beheer die R900 miljard staatsbegroting? Wie stel die Polisie en Weermag aan en wie gee vir hul bevele? Wie bepaal wat die name van die dorpe en strate is? Wie bepaal uiteindelik wat die onderrigtaal aan die publieke universiteite en skole is? Wie bepaal wat ons kinders aan die skole moet leer? Wie bepaal watter poste jy mag vul en nie mag vul nie? Wie bepaal of jou kind medies mag gaan studeer? Wie besluit wanneer jy mense van jou grond mag verwyder en wanneer nie? Wie bepaal of die boere droogtehulp gaan ontvang of nie? Wie besluit of jou plaas, waterregte, minerale regte,  besigheid, huis, bankbalans of pensioenfonds joune kan bly of aan iemand anders gegee moet word? Wie besluit of jy ‘n vuurwapen mag besit of nie? Vir wie sal jy moet vra vir ‘n bed indien jy jouself in die tronk sou bevind? Waar hierdie bevoegdhede as alleenreg uitgeoefen word, is dit die alleenvoorreg van oorwinnaars.

Oorlogsbuit

Wanneer ‘n groep mense oorwin word, word hulle nie in vrede en rus gelaat na die stryd nie. Die stryd word opgevolg deur ‘n proses waartydens oorlogsbuit van die verslaande afgeneem word. Die wins van oorwinning is rykdom. Die prys van oorgawe is armoede. So was dit nog altyd.

Die ANC het as oorwinnaars die staatskas oorgeneem en help hulleself mildelik daaruit. Munisipaliteite en staatsmaatskappye is tot by bankrotskap geneem. Aandelebeleggings in genoteerde maatskappy se waarde is verwater met BEE transaksies (tot soveel as ‘n derde van die waarde van bestaande aandele is vernietig deur nuwe uitgifte wat aan SEB-begunstigdes oorgedra is teen min of geen teenprestasie) terwyl die pensioenfondse van publieke amptenare geplunder is. Grond is oorgedra aan begunstigdes van grondhervorming.

Stellings deur president Zuma dat grond deur boere gesteel is en Julius Malema wat grond en banke wil onteien sonder vergoeding dui aan dat die proses om oorlogsbuit te plunder nog lank nie afgehandel is nie.

Dit is ‘n ope vraag hoe lank ons grondwet ons nog gaan beskerm. Die ANC en die EFF kan saam reeds met die seën van die oorgrote meerderheid Suid-Afrikaners die grondwet wysig om hul te pas. Die munisipale verkiesing gaan  in hierdie opsig ‘n interessante weerhaan wees wat sal aandui hoe naby die storm is. Indien die ANC in sekere munisipaliteite minder as 50% van die stemme kry, verwag baie kommentators dat die EFF en die DA ‘n koalisie sal vorm om die plaaslike regering aldaar oor te neem. Hulle is immers die opposisie en indien dit wel gebeur is die ergste ten minste vir ‘n paar jaar uitgestel. Indien die EFF egter besluit om sy rug op die DA te keer en eerder saam met die ANC in die bed te spring, sal die gort gaar wees, want die kanse is groter dat die ANC bereid sal wees om die EFF se radikale beleide oor onteiening in ‘n koalisieregering te aanvaar.

Hulp uit die buiteland?

Die internasionale finansiële markte bied waarskynlik vir ons meer volhoubare beskerming as wat die grondwet op sy eie sal kan bied. Dit het ons gesien met die vernederende ommeswaai wat president Zuma moes maak toe hy sy derde minister van finansies binne een week moes aanstel.

Die tyd sal leer hoe lank die respek vir die internasionale markte die lus na nog oorlogsbuit in bedwang gaan hou. Zuma se stelling dat hy die ANC eerste stel voor Suid-Afrika stel nie my gemoed gerus nie.

Vir meer direkte of tasbare steun moet ons egter nie asem ophou nie. Dit is duidelik dat die Weste hul hande vol het in die midde-Ooste, en dat selfs daar hul betrokkenheid uiters halfhartig is.

Frans Cronjé van die Instituut van Rasseverhoudinge het reeds in Augustus 2015 genoem dat Suid-Afrikaners na ‘n “plan B” moet kyk, daarmee saam het hy emigrasie as sy “plan B” uitgelig. Emigrasie blyk egter om vir al minder Afrikaners ‘n uitkoms te kan bied. Terwyl die Suid-Afrikaanse ekonomie spartel en die Rand vryval, beweeg die res van die wêreld aan. Gedurende Julie 2015 het die gemiddelde prys van ‘n tweeslaapkamerhuis (vrystaande huis, woonstel of skakelhuis) in Australië op $658 000 te staan gekom. Teen vandag se wisselkoers is dit R8 miljoen. In Sydney is dit R11.3 miljoen vir ‘n gemiddelde huis. Tydens die huidige vlugtelingkrisis was Australië slegs bereid om 10 duisend vlugtelinge te aanvaar. Hoeveel Afrikaners het werklik ‘n hoop om Suid-Afrika te verlaat wanneer dinge sleg raak?

Skep jou toekoms self

Flip Buys skryf vandag op Maroelamedia dat die geskiedenis ons leer dat daar altyd ‘n toekoms is. Onverwagse gebeure verander dikwels die verloop van sake, maar indien ons sake in ons guns wil draai is dit belangrik dat jy nie net op die toekoms moet wag nie. Hy skryf verder: “Die grootste uitdaging vir Afrikaners is om hul oorspronklike politieke verbeelding in te span en verby Nkandla en die huidige werklikheid ‘n nuwe toekoms raak te sien. Bepaal self hoe jy die koms wil hê, skep sterk organisasies en neem aktief deel aan die vorming van ‘n toekoms waarin jy ook vry, veilig en voorspoedig sal kan leef. Want die enigste toekoms wat jy kan voorspel, is die een wat jy self bou.”

Orania vier vanjaar sy 25ste bestaansjaar. Na baie gespot en belediging is dit duidelik dat Orania besig is om ‘n trotse tuiste vir al meer Afrikaners te word. Orania se grondleggers het die Afrikanisering van Suid-Afrika lank reeds voorsien en daarmee saam die negatiewe uitwerking wat dit op Afrikaners gaan hê. Orania is daarom ideaal geplaas om die werklikhede van demografie en meerderheidsregering in Afrikaners se guns te draai. Die aanvoorwerk is lank reeds begin. Met u bystand is ons potensiaal onbeperk.

7 Comments

  1. Sebastiaan Biehl

    Goeie artikel Ebert. Het jy RW Johnson se nuwe boek “How long will South Africa survive?” gelees? Dit bevestig wat jy skryf.
    Ek wil huil as ek dink dat ons al ons eie, voorspoedige staat kon gehad het as meer Afrikaners soos ek en jy gevoel en opgetree het en al jare terug Orania help opbou het. Ten spyte van beperkte steun en fondse is eintlik wondere in Orania verrig deur ‘n paar vasberade mense, maar as ons nie honderde maar tienduisende was, waar was ons dan nie al? As Afrikaners nie so veel tyd en energie op doodlooppaaie soos NNP, DA, emigreer ens gespandeer het nie maar op dit was wesenlik is, dan was ons al so veel verder.

    Reply
  2. Frits

    Baie goeie berig, en ek stem 100% saam. Ons almal weet dinge in SA gaan nie beter word vir die Afrikaner nie, so ons MOET selfbeskiking nastreef.

    Reply
  3. J du Toit

    Hallo Sebastiaan, ek stem saam met wat jy se. Soos jy sekerlik weet is emigrasie steeds meer populer as migrasie na Orania. Vir baie Afrikaners is die aanpassing in die buiteland baie moeilik, ander het doodgewoon nie die middele om daarby uit te kom nie.

    Miskien doen julle dit reeds, maar ek het gewonder as julle ‘n studie doen van hoe ander lande SA immigrante trek en dan daardie tegnieke naboots. Nou ja, ons almal weet NS en Australie is Eerste werelds en dit trek reeds mense, maar baie gaan ook bloot omdat hulle hoor ander trek soontoe.

    Neem bv die die werskwyse van emigrasie agente. Hulle reel ‘konferensies’. As voornemende emigrant bespreek jy ‘n plek (dis gewoonlik iewers in ‘n onthaallokaal in ‘n hotel) en dan spreek die agent die groep toe met ‘n vraag en antwoord sessie daarna. Natuurlik word adresse en name ook ingewin. Sou so iets nie dalk werk vir julle nie?

    ‘n Veredere taktiek is om op die hake van die emigrasie agente self te wees. Hulle moet heelwat kandidate wegwys omdat diesulkes nie dit op die punte sisteem maak nie. Watter ooreenkoms kan julle met hulle sluit? Of, advertensies soos ‘Australie wil jou nie neem nie? Ons sal!’

    Ek verstaan daar is ook ‘n migrasie stroom na die Suid Kaap. Ek is bevrees hierdie mense gaan bloot die reenboognasie daar herskep, want ons almal weet hoe hulle huishulpe ens indiens gaan neem. Weereens, stel Orania as alternatief vir die Suid Kaap.

    Laastens, baie wittes gaan na Australie in die geloof dat hulle hul lewenstandaard daar kan voortsit, maar in werklikheid is is dit nie so nie. Doen navorsing (soos jy reeds begin het) en wys uit hoe julle aanbod niks meer aanpassing gaan verg nie.

    Groete,

    Jacques

    Reply
  4. Anton

    Ek volg graag Orania se ontwikkeling hier uit Australie. Glo maar gerus, alles in die buiteland is nie maanskyn en rose nie. Ons mis SA baie. Dat daar voordeel is om ekonomies jouself te hefboom deur fondse in die buiteland te he is nou maar wors. Maar op die langduur staan almal se harte terug na SA. Ek dink ongelukkig het dit nog nie sleg genoeg gegaan om ons mense te kry om saam te staan nie. baie sterkte vir julle. ek dink 2016 sal ‘n bepalende jaar wees vir baie.

    Reply
  5. T. Hart

    Ebert en Sebastiaan

    Kan ek aanneem dat Ebert soos Sebastiaan, ook ‘n Oraniër is? Indien wel is lg se lus om te huil te verstane, maar dit lod nie die probleem op nie. Miskien is die raad wat Jacques het, iets wat oorweeg kan word.
    Andersins is daar miskien ook ander aksies wat geneem kan word. Wat van ‘n grondige studie van die hele Suider Afrikaanse [en selfs globale] situasie en die daadwerklike propagering van ‘n oorlewingsstrategie wat dan uiteraard die moontlike vestiging van meer groeipunte sal noodsaak?

    Miskien sou so ‘n aksie ‘n alternatief kon bied vir die duidelike ramp waarop die land afstuur. RW Johnson en selfs Solidariteit het duidelik iets beet.

    Reply
  6. Koos Odendaal

    Ek deel julle vreugde in die oase wat Orania besig is om te word vir al meer Afrikaners. My bekommernis dat Orania steeds in Afrika is omring deur die Afrikane en ‘n Afrikaner wat in Frankryk eiendom gekoop het het my oor die water laat gaan om te gaan verspied.
    Ek is Mei/Junie 2015 na die Limosin gebied in Frankryk waar ek ongekende onthullings gemaak het.
    Eiendomspryse in die Franse sentrale platteland het my plan B geword en ek voorspel dit kan Orania in Europa word.
    Ek kan my huis in Aliwal Noord omruil vir dieselfde grootte huis in Frankryk.
    GEEN CRIME. Ek stap op ‘n Woensdag middag half 3 by ‘n Supermark in en vind die verkoopspunte onbeman. Dit kos my omdraai om op die voordeur seker te maak die plek is oop!!!
    Met die ingaan gewaar ek tussen die rakke is n vrou besig om voorraad in te pak. Sy is die ENIGSTE persoon in die Supermark en wuif vir my en gaan aan met haar werk. Ek gaan die rakke deur, neem fotos, kry wat ek wil koop en gaan staan by die toonbank.Seker dertig sekondes later sien sy my raak en kom om my te help. Sy gaan dadelik weer terug na die agterkant om rakke te vul!!!!
    ‘n Paar engelse ou toppies wat ook vir hulle eiendom hier in die paradys kom koop het vertel dat hulle nie ‘n benul het waar hulle voordeure se sleutels is nie. Seker 5 jaar laas gesluit!!!
    Junie maand 2015: Diesel kos R21 per liter. Baie sal jy se.
    Maar ‘n boer koop mos diesel met sy lammers. In Frankryk 1 Lam = 78 liter diesel by petrolpomp. In SA 1 lam = 64 liter diesel by BKB.
    In Frankryk as die Nederlandse melkboer reg is 160 liter gesubsidieerde diesel per lam.

    Die kelnerin in die hotel verdien 10 euro per uur (min loon 8,75 Euro/uur)’n 200gram Rumpsteak met skyfies, slaai en franse brood kos 12 euro op spyskaart. Sy werk 1 uur en 10 minute dan eet sy ‘n steak.
    ‘n Franse brood kos 78 Euro sent in Supermark ;maar kom ons se 1 euro.Haar 7 uur werksdag lewer 70 brode op!!!! Jy kan self vergelyk.

    Hier is ‘n Geleentheid van ‘n leeftyd wat vir ons Afrikaners wag om ons voet in die deur te kry vir ‘n gediverseerde portefeulje.

    Ek deel die inligting net met Wit Afrikaner vriende.

    Die dorp waarin ek was het +- 2000 wit inwoners en haas elke boer doen al sy werk self. Orania kom ons gaan ondersoek.

    Groete

    Koos Odendaal
    Rouxville
    (Ja daar waar ek die dr boer en sy vrou moes gaan help nadat barbare hulle Donderdag nag wreedaardig haas vermink het)

    Reply
    • Sebastiaan

      Beste Koos,
      ek hoop nie jy gee om dat ek my reaksie op jou epos vanoggend oor dieselfde inhoud ook op die openbare blog vir die publiek weergee:

      Dankie vir die skrywe en die inligting. Laat ek ʼn paar opmerkings uit my perspektief maak as iemand wat lank in Europa gewoon het (spesifiek in Duitsland, maar ek ken Frankryk ook van verskeie reise), dan jarelank in die “gewone” Suid-Afrika en nou al meer as 10 jaar in Orania.

      Die besoeker aan Europa is altyd beindruk met hoe mooi en georden dinge daar is. Hulle het nie plaasmoorde en misdaad soos ons nie (en ek was diep geskok oor die nuus uit Rouxville, al lees ‘ mens ongelukkig weekliks van aanvalle en moorde) en ek kan goed verstaan dat ʼn mens nou dik is vir die land en net wil wegkom.
      Maar onthou, dit is een ding om ʼn toeris te wees, die ander ding om ʼn immigrant te wees. Frankryk het van die hoogste belastings in die wêreld (want iewers moet die subsidies mos vandaan kom), is sterk gereguleer en dit is ook nie ons mense nie. Die platteland daar ontvolk en elders verander die demografie ook maar. Alles is nog nie so erg soos in Suid-Afrika nie, maar hulle loop maar dieselfde pad en die meerderheid Franse is blykbaar nie bereid om drastiese besluite te neem nie. Die terroristeaanvalle is dalk maar eers die begin. Daar is ook weer Franse wat wil emigreer, so elke ou dink maar sy land is sleg en die ander een sʼn is beter. Dat Suid-Afrika seker in die slegste tyd sedert die groot Depressie is, lyk na ʼn feit en die regering is vir seker ʼn ramp.
      Al die dinge het mense soos prof. Carel Boshoff al in die 1980’s voorsien en by ons mense gepleit om die Afrikaner-volkstaat te bou. Min het die roepstem gehoor en daarom is Orania nog steeds klein, maar ons is darem daar en groei want ons uitgangspunt is reg en die tyd het ons reg bewys. Ons eie arbeidsbeginsel, waaroor veral boere spot, maak dat ons die veiligste plek in die land is en hier nog nooit enige misdaad erger as diefstal was nie (en dit gepleeg van ons eie mense). Een van die aanvallers op die dokter en sy vrou van Rouxville was ʼn voormalige plaaswerker, verstaan ek.
      Daardie dinge wat u van die winkel in Frankryk se platteland skryf geld vir Orania ook. Talle huise se deure het nie eens sleutels nie, mense wat groente verkoop los dit op die sypaadjie met die geldbussie om self te neem en te betaal, hier is geen diefwerings nie ens.
      Ja, ek hoor wat u sê, ons is in Afrika en is nie heeltemal geisoleerd van die res nie. Maar ons is ʼn konsentrasie Afrikaners in ʼn andersins baie yl bevolkte streek en kan ons self handhaaf en doen dit, ten spyte van gereelde doemprofesieë, nou al vir 25 jaar. Ons sal beslis nie alles weer opgee en van vooraf begin in Frankryk of iewers anders nie. Afgesien daarvan sal ons nie net kan immigreer na ʼn ander man se land nie (die swartmense en Arabiere wat Frankryk oorstroom kry dit reg, maar ons sal die amptelike, moeilike roete moet volg), ons geld is daar niks werd nie, en ons kan nie Afrikaners wees in Frankryk nie en ook nie sommer besluit om ʼn dorp oor te neem nie. Individue kan wel emigreer en Franse word, maar wat is die doel daarvan? Ons wil Afrikaners in Afrika wees, in ons eie land.
      Kom besoek ons gerus in Orania en kyk of dit nie eerder ʼn heenkome bied as Frankryk nie. Hier kan u Afrikaans praat, u Christenskap uitleef en u werk in vrede met u medemens self doen.

      Reply

Submit a Comment

Jou e-posadres sal nie gepubliseer word nie.

thirteen − 9 =