Failing stateEskom is tans weer die nuusmaker van die afgelope tyd. Eintlik is dit egter niks nuuts nie. Eskom-probleme kom al ‘n lang pad en sowat 3 jaar gelede het dit ook kop uitgesteek. Toe die beurtkrag egter verby was het mense gedink die probleem is nou sommer opgelos en het voortgegaan asof niks gebeur het nie. Eintlik moes meer mense die tekens van die tye reg gelees het en voorsiening gemaak het vir die dag wanneer Eskom heeltemal verbrokkel. Dis nie genoeg om kerse en gasbottels aan te hou vir noodgevalle nie. Dit is eerder nodig om jouself heeltemal onafhanklik te maak van Eskom. Danksy tegnologiese vooruitgang in die sonkragbedryf is dit moontlik om jou hele huishouding met alternatiewe energie te bedryf. Hier in Orania is ‘n voorbeeld van ‘n aardskip, ‘n huis wat totaal en al self-onderhoudend is: eie krag, eie water, eie riolering en eie groente wat binne die huis verbou word. Wanneer munisipale dienste verval, soos elders in die land, dan sal die Aardskip soos Noag se ark kan aangaan.

‘n Mens hoef egter nie so vêr te gaan soos om ‘n Aardskip te bou nie. Jy kan jou krag self opwek met sonpanele en solank begin om groente in jou erf te verbou. Dit sal ‘n aanpassing verg vir Afrikaners wat gewoond is aan die kitssamelewing, maar die kitssamelewing is nie net sleg vir die omgewing en langtermyn onvolhoubaar nie, dit is iets wat Westers is en in Afrika net in sekere geglobaliseerde groot stede sal voortbestaan.

Waar daar mense saamgetrek is wat dieselfde doelwitte nastrewe en dieselfde kultuur deel, is dit soveel makliker om oplossings te vind vir die tyd wanneer die staat net nie meer in praktyk bestaan nie. Kultuur, terloops, is nie net die “hoër funksies” soos musiek, literatuur, feeste ens nie, dit is die manier hoe sekere volke dinge doen. Dit het ook baie met die ekonomie te make.

Waar mense uit dieselfde kultuur saamgetrek is, is dit soveel makliker om funksies wat ‘n staat moet vervul, te privatiseer en as gemeenskap te bedryf. ‘n Eie klein sonkragsentrale vir Orania is moontlik. Voedselsekerheid en die uitruil van eie produkte moet bevorder word, want as daar nie meer krag is nie, word brandstof ook skaars (want dan word meer benodig vir turbines) en veral plattelandse plekke word nie meer uit die sentrums deur vragmotors met kos bedien nie.

Ook op die gebied van opleiding moet ons ons eie strukture skep. Afrikaners is, soos alle mense geneig om altyd eers die maklike paaie te beproef al is dit doodloopstrate. Vir lank is geglo dat Potchefstroom Universiteit ‘n uitkoms bied en ‘n Afrikaner-eiland is omdat dit ‘n Afrikaanse kampus is met sterk ondersteuning van gesaghebbende Afrikaners. Dieselfde is van Stellenbosch ook geglo,wat deur sy verankering in die Afrikaanse Wes-Kaap en sy pragmatisme beskerm sou word. In die totalitêre “transformasie”-ideologie van die regering, en veral sy kommunistiese minister van Hoër Onderwys, Blade Nzimande, is daar egter nie ‘n bestaansreg vir instellings vir die minderheid nie, al is daar reeds 20 of meer universiteite wat Engels is.

Al wat oorbly is die stigting van ‘n private Afrikaanse universiteit (met ‘n Christelike etos) wat Solidariteit nou doen en waarvoor hulle lof en steun verdien. Al sal sommige meningsvormers dit verguis as isolasionisties en teenproduktief  sal dit ‘n instelling word wat akademiese uitnemendheid bevorder en wie se studente gesog sal wees in die arbeidsmark. Ook ‘n ambagskool, wat tans in Orania gebou word, vul ‘n belangrike gaping want die staatsgedrewe ambagsopleiding deur middel van Setas werk nie.

Hoe gouer ons besef dat ons op ons eie is en nie op ‘n staat, al het ons voorouers dit opgebou, moet staatmaak nie, hoe beter. Ons moet ons ook nie laat mislei deur mooiklinkende praatjies van die regering dat ons “almal saam Suid-Afrika moet laat werk” wat gewoonlik op openbare vakansiedae en voor ‘n Afrikaner-gehoor geuiter word. Ons weet uit ondervinding hoe lyk daardie “samewerking”: ons betaal en die regering besluit hoe dit bestee word sonder om ons te vra.

Om jou eie instellings te skep is niks nuuts vir Afrikaners nie. Lank voor die staat in die besit van die Afrikaners was het Afrikaners hulle eie instellings geskep in ‘n omgewing wat onsimpatiek en Engels-individualisties ingesteld was. Ons kan vergeet om die regering te wil oorneem, selfs as junior-vennoot in ‘n breë koalisie. Ons kan ook vergeet om deur smeek en witvoetjie soek of deur onsself onmisbaar te wil maak iets van die regering te kry. Al wat ons kan doen is om weer ons eie instellings te skep, deur onsself en vir onsself.

 Sebastiaan Biehl is `n navorser verbonde aan die Orania Beweging.

 

Orania Beweging
Orania Beweging

8 Comments

  1. Theuns

    Stem 100% saam met die opsies wat nagevolg moet word,soos hier uiteengesit en bespreek. Eie nergie/ onafhanklik is ‘n vereiste om nie onderhewig te wees aan buite invloed nie, veral in die be-oogde “eie” omgewing. Dis ‘n stap na die toekoms, indien toegepas…. Uitstekende blog/skrywe.

    Reply
    • Sebastiaan

      Dankie Theuns.

      Reply
  2. Oom Ref

    Stem 100% saam met die opsies, Sebastiaan. Daar is egter een aspek wat ons aandag ontgaan het en dit is hoekom al hierdie ellendes met ESKOM saam ons vandag tref. Toegegee, die gebrek aan ‘n onderhouds-program dra sekerlik by tot die probleem, maar wat doelbewus met voorbedagte rade oor geswyg word is die volgende: Tydens hulle oorname in 1994 van die toe bestaande netwerk het ESKOM doelbewus die opwekking van 17 kragsentrales landswyd gestaak aangesien daar volgens hulle ‘teveel krag in die land geproduseer was!’ Kan jy dit glo?

    Die inligting verkry ons die afgelope week van een van die senior amptenare wat destyds nog in diens van ESKOM was. (Dit sal miskien die moeite werd wees om hierdie feit te verifi-eer.)

    Indien dit blyk die waarheid te wees, is dit weereens maar net nog ‘n openbaring met watter sluheid/boosheid ons in hierdie land te doen het.

    Laat ons onverpoosd voortgaan om maniere te vind om ons onafhanklik van regerings-innisiatiewe te maak.

    Innige groete en sterkte daartoe aan elkeen wat hiertoe meehelp,

    oom ref.

    Reply
    • Sebastiaan

      Dankie oom Ref. ‘n Interessante stuk inligting.

      Reply
  3. Joffre Papenfus

    Ons uitdaging raak om op meerdere vlakke aan oplossings te werk:

    Ons grootste energie moet in die oplossings self gestort word.
    Daarnaas moet daardie oplossings op wisselende skaal toepassing vind: dit is goed en ‘n aanmoediging om Orania se vordering te sien, maar die oorgrote meerderheid van ons volk kan nie buite die huidige stede en nywerhede ‘n heenkome vind sonder aansienlike nywerheidsontwikkeling elders nie – ons mense is reeds tot groot mate kunsmatig verarm.

    Ons moet ook begin organiseer tee nasionale belastings, maar binne wetgewende raamwerke: want wanneer ek my kind in ‘n CVO skool plaas, betaal ek twee- en driedubbele skoolgeld en onkoste:
    Met dank die koste verbondeaan gehalte, waarde-gegronde onderwys;
    Maar in afwesigheid van belastingverligting betaal en ook die staat!
    (hierdie geld elke diens wat ek self lewer of befonds)

    NS:
    Nuwe aksies is meestal goed; onthou egter dat instansies soos BCVO en die APA die pioniers is van onderrig met ‘n ware, suiwer Christelike etos.

    Reply
  4. Ludwig Everson

    Tussen hakkies die groen dak wat julle sien op die Webkamera 1 is die http://www.aardskip.com.

    Reply
  5. Dirk Breytenbach

    Ons behoort SA en die belastings wat ons betaal te verdiskonteer (afskryf) en te fokus op ‘n toekoms waar ons self oplossings ontwikkel en ook kommersialiseer tot ons voordeel. Verwag NIKS van die regering nie, hulle verdra ons maar verag ons terselfdertyd en dit gaan nie verander nie.

    Reply
  6. BJ de Jager

    Tot dus verneem ek aan dat Orania (VAB en instansies)himself vd been af gebring het vir die laaste 20 jaar deur groeie en instandhouding as ook onderhouding vd werker in Orania is dit nie nou tyd vir n nuwe periode waar daar n bemagtings skemas in plek kan gestel word in so doende n middel klas te vergroot wat weer eens diens lewerings werk kan verskaf vir die mense wat weer onder begin so kan n basis geskep word waar op Orania automaties gegenireerde ekonomie kan skep.
    Voorbeeld is dat plaas daar van om 10 huise te bou wat maar n inkomste bied van R3500 per maand vd eienaar kan daar 10 besighede geskep of gekoop word wat R20 000 per maand kan maak en sodoende 10 families n beter salaris te betaal as om net weer 10 arme families behuising te gee.
    Sukses van n volkstaat hang af van vele komponente en die skep van n middel klas.N staat wat nie n middel klas het nie word net n welsyn staat.Die mense word ook net gemotiveer deur n trek faktor en nie deur verandwoordelikheid nie,

    Nie almal is bereid om n verbetering te maak aan hulle lewe nie ,maar die wat wel die verskil wil maak en hardwerk moet die kan gegee word en bemagtig word in n volkstaat.Weet nie of daar enige bemagtiging programme is in Orania nie?

    Reply

Submit a Comment

Jou e-posadres sal nie gepubliseer word nie. Verpligte velde word met * aangedui

5 + twenty =