Suid-Afrika se ontwikkeling was en is nog altyd gekoppel aan die ontginning van minerale. Alhoewel dit die uitbou van die infrastruktuur aangemoedig het en ook tot grootskaalse werk- en welvaartskepping gelei het was dit, alles in berekening gebring, eerder ‘n vloek as ‘n seën. Verskeie imperialistiese oorloë is primêr oor die toegang tot minerale geveg, by name die Tweede Vryheidsoorlog met sy groot nood en ellende wat dit vir die Afrikanervolk gebring het. Na die Tweede Vryheidsoorlog was die Afrikaners genoodsaak om as tweedeklasburgers in Brits beheerde myne te werk, omdat hulle onafhanklike landboubestaan na die vernietiging van die oorlog vir hulle onmoontlik geword het. Ook die swart volke is ontwrig en van hulle landelike bestaan ontneem. Die hele ideaal van afsonderlike ontwikkeling van elke volk op sy eie stuk grond is in ‘n groot mate deur die alewige behoefte aan goedkoop (swart) arbeid ontspoor.

Die persepsie is, om verstaanbare redes, veral in Suid-Afrika gevestig dat minerale rykdom die voorwaarde van ontwikkeling is. Om die rede is die rykdom van die land in die huidige of voormalige myngebiede rondom Johannesburg gekonsentreer en ontwikkel myndorpe soos Kathu, Ellisras en Thabazimbi vinnig. Die mynbouverwante ontwikkeling is egter ‘n valse soort ontwikkeling. Dit skep vinnig rykdom en net so vinnig weer ellende, as die pryse vir minerale daal en die myn afskaal of selfs sluit. Kyk hoe lyk wat eens ‘n voorspoedige gebied rondom Welkom was nou. Die probleem met mynbou is dat dit min volhoubare ontwikkeling skep en min waarde toevoeg. Omdat dit veral ongeskoolde en half-geskoolde werkers benodig word min in opleding belê en kan afgedankte mynwerks moeilik in ander bedrywe werk kry. Dit geld nie net vir Suid-Afrika nie, maar bykans vir die hele Afrika, wie se nasionale ekonomie omtrent almal op die ontginning van minerale gebou is. Suid-Afrika was die enigste uitsondering omdat hier behalwe die mynbou onder die Nasionale Party regering ook produksie en dienste aangemoedig is en ontwikkel het. Intussen is die voordeel egter feitlik ongedaan gemaak en het die bydrae van nywerhede tot die Brutto Nasionale Produk (BNP) gehalveer. Die relatiewe voorspoed van Suid-Afrika in die Mbeki-era het veel te doen gehad met die opkoms van Sjina en die commodity super cycle wat egter nou op sy einde is.

Die ware goud van die 21ste eeu is vaardighede. Dit is nie toevallig dat so baie hoogs gekwalifiseerde Suid-Afrikaners die land verlaat om elders, veral in die Eerste Wêreld, te werk nie. Hulle vaardighede is so gesog dat hulle amper kan kies en keur en astronomiese salarisse verdien. Omdat Suid-Afrika sy opvoeding so verwaarloos en boonop weens “regstellende aksie” wetgewing toegang tot die arbeidsmark reguleer, is daar al hoe minder oor om die plek van die emigrante te vul. Dit ten spyte van die regering se lippetaal oor de belangrikheid van opvoeding. Skole en universiteite is nie meer in die eerste plek opleidingsinstellings nie, maar ideologiese breinspoel-instansies met swak dissipline. Boonop hou te veel studente hulle met onbruikbare studies op waar hulle nêrens behalwe op ‘n universiteit kan werk kry nie. Afgesien daarvan word goed werkende Afrikaanse universiteite uit alle oorde gedruk om te “transformeer”, weg van gehalte opvoeding in Afrikaans na Engelse massa-opvoeding.

Lande wat in opvoeding belê het pleks in die ontginning van hulpbronne is vandag onder die mees welvarendste samelewings. Een voorbeeld is Singapoer, wat oor geen hulpbronne beskik nie, maar sterk klem plaas op gehalte opvoeding en opleiding, saam met die Oosterse dissipline. Dit is ‘n trekpleister vir globale kenniswerkers. Ook Taiwan en Suid-Korea plaas ‘n sterk klem op opleiding. Suid-Afrika vaar swak in internasionale toetse oor vaardighede. Dit skrik ook beleggers af.

Dit alles roep na goeie opvoeding en toepaslike opleiding. Op skoolvlak moet jy die basiese vaardighede en kennis, soos lees, skryf, wiskunde, fisika, geskiedenis aanleer en daarna moet jy spesialiseer in ‘n rigting volgens jou belangstelling en aanleg, maar veral ook volgens die behoefte. Myns insien word ’n universiteitsgraad oorskat en te veel as prestige gesien, terwyl vaardighede wat werklik skaars is nie meer aangeleer word nie. Dit is reeds duidelik dat gekwalifiseerde ambagsmanne skaars raak en die bestaandes nie meer kan voorbly met werk nie en bykans enige prys kan vra. Toe die regering egter die verantwoordelikheid vir opleiding van die maatskappye ontneem en oorgedra het aan die SETAS (Skills Education Training Authorities), het die gemors begin. Die SETAS sou in elke beroepsektor opleiding verskaf, gefinansieer deur maatskappybydrae, maar soos in meeste gevalle waar die Suid-Afrikaanse staat betrokke is, het daar min van gekom.

Orania kan ‘n sleutelrol vir opleiding speel. Ons skole vervul reeds ‘n rol vir die kinders van Orania asook van die streek, en ook wat afstandsonderrig betref vul Orania ‘n belangrike leemte. ‘n Universiteit is tans buite ons bereik maar dit is ook nie nou so nodig nie. Die groter behoefte bestaan in gekwalifiseerde ambagsmanne. In die groeifase waarin Orania homself bevind word veel gebou en ontwikkel en dit kan net gebeur as daar die regte persone is wat dit kan doen. Die tegniese skool wat tans in aanbou is en na beraming later vanjaar voltooi sal wees, kom dus op die regte tyd. As Suid-Afrika se laaste goud, ystererts en koper ontgin is sal die onuitputbare bron van goeie opleiding en opvoeding van Orania ‘n plek van uitnemendheid en ontwikkeling maak. Laat ons belê in ons kinders en ons volk se toekoms deur in hulle (Afrikaanse, Christelike en gedissiplineerde) opvoeding en opleiding te belê.vaardighede

Blog Single

Opvoeding is die sleutel tot ontwikkeling

by | Jan 5, 2016 | Nuus | 9 comments

9 Comments

  1. Jean

    Puik stuk werk. Die internet maak alles net soveel makliker. Ek het my wisk 1 gedoen deur unisa laasjaar. Die studiegids was absoluut onbruikbaar. Ek het deur Khan Academy op die internet gratis klasse gekyk en 80plus behaal.

    Al wat mens nodig het deesdae is n rekenaar met goeie internet. Dit is voldoende vir teoretiese opleiding. Praktiese opleiding is moeiliker.

    Dus is julle in die kol met die tegniese skool.

    Reply
  2. Ivor Davis

    Hoeraa, hoeraa vir Orania!!! Top! Stem heeltemal saam. My seun het na Soltek se opleiding sentrum in Pretotia gegaan om opgelei te word as dieselwerktuigkundige. Hy het sy N2 en 30-weke werkwinkel fase voltooi. Hy het sy N3 by Ntek ook in Pretoria gedoen. Nou moet hy begin werk. Sukkel nou net bietjie om ‘n pos te kry as vakleerling by een van die motor maatskapye dienswerkwinkels. Dis nou nuwe jaar. Vakansie is verby en almal is terug. Hy sal binnekort ‘n pos kry. Baie trots op hom. Kom Afrikaaners. Staan saam. Hou hande vas en skep ‘n toekoms vir ons Afrikaanerkinders! SEB se voet. Ons wys hulle wat ons kan doen!!! Groetnis. Ivor.

    Reply
    • Sebastiaan Biehl

      Dankie vir jou entoesiasme, Ivor. Ja, ons kan ons eie toekoms bou.

      Reply
  3. Willem Fourie

    Geagte Leser,

    Ek verbeel my Sebastiaan het in ‘n vorige stuk gemeld dat Singapoer, ‘n sandbank sonder grondstowwe, se amper onbeskryflike success te danke was aan 1.Samehorigheid, 2.Spaarsaamheid, en 3.Opleiding

    Mooi loop

    Reply
  4. revo, revas, revat

    revo,revas, revat!

    Overgesetsynde: Ek kom, Jy kom en Hy, sy dit kom!

    Mag ons almal tot die insig wat jy in jou brief uitspel, kom Sebastiaan. Baie dankie vir die aanmoediging en riglyne. Miskien is ons oor ‘n paar maande verras watter impak hierdie wyse woorde van jou nog gaan he^.

    Innige groete

    revo, revas, revat!

    Reply
  5. anton

    Die opleiding van ambagsmanne is ‘n positiewe ding. Maar waar gaan die tegnici werk vind ? Ek dink meeste sal buite Orania, in die RSA moet gaan.
    Orania kan m.i. werk skep deur die water van die Oranjerivier aan dorre aangrensende plase en dorpe te voorsien : dan moet daar pypleidings en pompe geinstalleer word. Die elektr.krag benodig vir die pompe kan verkry word van die son wat ryklik op Orania neerdaal en vasgevang kan word deur ‘n enorme plaat van sonpanele : nog meer werk vir die ambagsmanne !

    Reply
    • Sebastiaan Biehl

      Anton, ek sien die toekoms van orania eerder by vervaardiging as nog meer landbou. Boonop word waterregte deur die staat toegestaan en Orania kan ongelukkig nie pyplyne aanlê soos ons wil nie. Reeds die bestaande besighede soek ambagsmanne en as hier goed opgeleide werkers beskikbaar is, sal dit ook meer beleggers trek. Tans is onvoldoende arbeid nog ‘n rede wat talle beleggers terughou. Natuurlik sal ten minste in die begin nie alle ambagsmanne in Orania werk vind nie, maar dit is ook reg as hulle elders werk vind, hulle kan altyd weer later, as hier meer geleenthede is, met hulle ondervinding terugkom. My idee is dat Orania kan help met “invoervervanging” sowel vir Orania asook ten dele vir die res van Suid-Afrika. Suid-Afrika moet deesdae feitlik alles ten duurste invoer wat maklik en goedkoop self gemaak kan word. Ek dink veral aan produkte soos onderdele en sekere swaar en tegnologies eenvoudige gereedskappe soos implemente, sleepwaens ens.

      Reply
  6. Jaco Grobler

    Ek stim, gesien in ‘n Suid Afrikaanse konteks, is ek baie verbaas dat dit nie deur die regerende party gesien word as ‘n oplossing tot die grootste deel van die land se probleme nie. Mense is ‘n hulpbron, net soos minerale, natuurskatte en water. Gebruik die hulpbronne waarvan jy baie het; en aan siele het ons geen tekort nie. Boonop is die einste hulpbron self onderhoudbaar, in teenstelling met meeste ander hulpbronne.
    Dink nou net wat sou gebeur het as die regering elke kind 20 jaar terug op ‘n rigide opleidingsprogram geplaas het…teen die rand/$ koers sou miljoene mense vandag in die buiteland kon werk kry, belasting vir die land verdien en die stremming op ons eie hulpbronne verlig het, hulle sal ook natuurlik hulle eie mense wat agterbly ondersteun, en so ook die sosiale las verlig, asook kapitaal inbring as hulle kom ‘kuier’

    Reply
    • Sebastiaan Biehl

      Die regering opereer vanuit die sosialistiese paradigma. Een kernuitgangspunt is dat mense hulle nie self kan help nie maar die slagoffers van ‘n nregverdige stelsel is. Dus moet die stelsel vernietig en deur ‘n beter een vervang word, volgens die denke. Verder is selfstandige, voorspoedige en selfdenkende mense gif vir sosialisme, omdat sulke mense deur die onwerkbaarheid van sosialisme kyk. Sosialiste wil eerder die massa ongeletterd en permanent afhanklik van die staat hou, want dan bly hulle stem vir diegene wat uitdeel. Daarom is die VSA, Hongkong, Taiwan ens suksesvol en Venezuela, DRC en Kuba nie.

      Reply

Submit a Comment

Jou e-posadres sal nie gepubliseer word nie. Verpligte velde word met * aangedui

one × 2 =