2A8BF0AD00000578-0-image-a-19_1436986911719‘n Besoek aan Rome en die res van Italië is gewoonlik hoog op die prioriteitslys van die meeste reisigers. Die Antieke Romeinse ryk het ‘n groot kultuurskat agtergelaat. In daardie opsig is Italië vandag ‘n bevoorregte land. In stede soos Rome, Venesië en Milan is daar prag Katedrale en volop ander argitektoniese, kuns en kultuurskatte.

Miljoene toeriste reis jaarliks na Italië om die prag en praal van die ou Venesiese Ryk, die Colosseum in Rome of net die pragtige kuslyn met sy olyfbome en lieflike kusdorpies te beleef. Ten spyte daarvan dat Italië al hierdie dinge geërf het, sien ons vandag hoe infrastruktuur regdeur die land verkrummel.

Mense wat in die toerismebedryf in enige plek in die wêreld werk, weet hoe belangrik die Europese somervakansie is. Vanaf Junie tot Augustus gaan Europeërs op reis. Veral mense uit noordelike lande en streke soos Nederland, België, Duitsland en Skandinawië reis graag na Italië vir somer, son en ‘n blik op die roemryke Romeinse verlede. Vir Italië is hierdie toeriste besonder belangrik. Vakansiegangers uit die ryker noorde van Europa kan vrylik na Italië reis en bring baie geld vir die land se ekonomie in.

Die Italiaanse ekonomie het die afgelope paar dekades toenemend meer afhanklik van toerisme geraak. Italië is tans die vyfde gewildste land vir toeriste in die wêreld. Byna 50 miljoen mense gaan hou jaarliks in Italië vakansie.

Die terugvoer van toeriste aan Italië se groot stede is egter deesdae gemeng of selfs negatief. Rome verkeer reeds vir ‘n geruime tyd in een groot krisis. ‘n Studie van die Europese Kommissie in 2013 het gewys dat Rome uit die 28 Europese hoofstede die swakste vlakke van dienslewering het. Die stad se openbare dienste word algemeen as oneffektief beskryf.

Die afgelope twee maande beleef Rome die een krisis na die ander. Eers het ‘n brand ‘n deel van die internasionale lughawe vernietig. Die land het steeds geen duidelike plan oor hoe om die lughawe te herstel en lugvervoer weer op ‘n hoë vlak te kry nie. Die Fiumicino-lughawe staan reeds vir jare as een van die swakste groot lughawens in Europa bekend.

Verlede maand het Rome vir drie weke ‘n hittegolf beleef. Die stad se elektrisiteitsnetwerk het ernstige probleme begin toon. Op straat het vullisdromme oorgeloop en begin stink. Treindrywers staak gedurig en toeriste kla almal oor die swak instandhouding van openbare parke, geboue en paaie.

Die probleme in Italië is nie tot Rome beperk nie. Ook in Venesië gaan infrastruktuur agteruit. Ander dele van die land ervaar dieselfde. Die huidige olyfboomkrisis in die suide van Italië is soos die kersie op ‘n baie slegte koek. Waarskynlik meer as een miljoen olyfbome, baie selfs meer as 1000 jaar oud, word tans afgesaag en verbrand weens ‘n siekte wat soos ‘n veldbrand deur die olyfboorde van Italië versprei. Ook hier lyk dit asof Italië se regeerders nie oor die vermoë beskik om ‘n plan saam te stel om die probleem effektief op te los nie.

Waar het alles vir Italië verkeerd geloop? Die beste manier om Italië se probleme op te som is om te sê dat Italië ‘n duidelik geskiedenis, maar geen toekomsplan het nie. Waar jy in Italië reis sien jy die geskiedenis, maar niemand weet regtig waarheen die land oppad is nie. Geen land kan net op sy roemryke geskiedenis bly teer sonder om nuut te skep, te produseer en ‘n behoorlike toekomsvisie te ontwikkel nie. Soos wat ou geboue, kuns en mooi landelike tonele nie Italië alleen kan red nie, kan Suid-Afrika se Apartheidsgeskiedenis en selfs ons wonderlike landskap en diereryk ook nie ons red nie. ‘n Land sonder ‘n toekomsvisie en goeie leierskap is gedoem.

Die jongste toerismestatistiek toon dat Suid-Afrika in April ‘n daling van meer as 10% in toeriste beleef het. Sowat 35% minder Duitsers het die land ‘n in dieselfde maand verlede jaar besoek.

In Orania beleef ons sover elke maand hierdie jaar ‘n styging in besoekers. Ons het dalk nie ‘n groot wildtuin en mooi ou geboue nie, maar dinge in Orania word goed bestuur. Dit beteken nie dinge kan nie beter bestuur word nie. Hier is nog baie ruimte vir verbetering, maar die punt is eenvoudig: ‘n Plek met goeie, voortdurend verbeterende infrastruktuur, ‘n duidelike toekomsplan en goeie bestuur staan ‘n beter kans om suksesvol te wees. Dit is wat ons ook in Orania moet regkry indien ons hier ‘n Afrikanerstad wil bou waarvan die wêreld kennis sal neem.

Blog Single

‘n Land sonder ‘n toekomsplan

by | Aug 4, 2015 | Nuus | 8 comments

8 Comments

  1. Sebastiaan

    Daar is blykbaar ‘n gesegde: “Italië is die paradys, maar word deur duiwels regeer”. Toerisme is ‘n tweesnydende sward: dit bring baie geld in en skep talle werksgeleenthede, maar vernietig kultuur en outentiekheid, jaag pryse op en belas die infrastruktuur. Ook toerisme moet bestuur word. Lande en stede wat slim is fokus op kwaliteit kultuur-toerisme en bring eerder minder, maar welvarende besoekers in as die massas wat breek en lawaai en selde meer as kitskos koop. Blykbaar raak die “cruise ship” verskynsel ‘n egte las vir reeds oorbesoekte stede soos Venisië en Barcelona. Die mense bly en eet op die skip en loop in massas vir ‘n paar ure deur die ou stede en meen fotos en lewer andersins geen bydrae nie.

    Reply
  2. Christo Conradie

    Goeie waarneming, Jaco. Hier in Orania is die skatlike ou boeregesegde baie aktief: plannemaak is n boerdery! Ons is elke oomblik besig om planne te maak,- ook planne om beter planne te kan maak en dan planne om al die planne te kan finansier! Daarvan getuig ons spandering van geld, tyd en energie aan dinge soos die Sosio-Ekonomiese Studie en die Ekonomiese Ontwikkelingsplan waarmee ons so pas afgeskop het. Benewens die Omgewingsbestuursplan, Energiebestuursplan, Waterbestuursplan en vullisbestuursplanne waarmee ons ook tans besig is, sal daar dan ook gewerk word aan planne vir toerisme, nywerheidsvestiging, landbouverwante bedrywe, korporatiewe en professionele fasiliteite en dienste en dan die kersie op die koek: opleiding op soveel moontlike terreine.
    Ons toekomsplan kan as volg verwoord word: om Orania n stad van uitnemendheid te maak!

    Reply
  3. Anthony Schlemmer

    Verhoogte besoekers getalle kan toegeskryf word aan die haglike politieke toestand waarin Afrikaners hulle tans bevind. Nie noodwendig die prag en praal van Orania nie…

    Die dorpie se voorkoms het baie verbeter, veral die aantrede gebied. Alhoewel verbeteringe by die Vulstasie teen ‘n slakkepas vorder.

    Puik artikel. Ek sien die regte visie is daar onder leierskap.

    Reply
  4. Christo Conradie

    Anthony, m.b.t. die vulstasie reageer graag met goeie nuus: die hele gebied gaan opgegradeer word, plaveisel, strate en belandskapping, die hele werke! Die planne en geld le reg, maar daar is twee uitdagings. Eerstens moet daar ondergrondse brandstoftenks vervang word alvorens geplavei kan word. Daar is ons uitgelewer aan n nasionale brandstofmaatskappy. Tweedens was daar al tenders uit vir n eerste fase maar kon ons nie n suksesvolle kontrakteur bekom nie. Ons werk nou daaraan om ons vermoe in die dorp vir groot konstruksieprojekte in plek te kry en is byna gereed.
    Ek glo jy sal verkies dat ons liewer met n slakkepas vorder as om weer in demografiese slagysters te trap!

    Reply
    • Anthony Schlemmer

      Dankie Christo, ek waardeer die terugvoering. Ek het so gedink en verstaan die dilema.

      Reply
    • Morne Pitout

      Hallo Christo

      Wil baie graag weet; hoe beoog julle om julle “vermoë in die dorp vir groot konstruksieprojekte in plek te kry”?

      Deur bepalende projekbestuursbenaderings en/of sekere (IT) tegnologie ens?

      Dankie baie

      Reply
  5. hannodb

    Ai, dit raak al weer tyd dat ek Orania besoek.

    Ek sien julle hopelik weer volgende jaar. Dis so lekker om elke keer te kom en te sien hoe die droom besig is om waar te word. Veral om te sien hoe die voorspelling dat groei eksponensieel gaan geskied ook oor die jare waar bewys is.

    Reply
    • Sebastiaan Biehl

      Mooi, Hanno. Maak so. Jy was inderdaad lanklaas hier.

      Reply

Submit a Comment

Jou e-posadres sal nie gepubliseer word nie. Verpligte velde word met * aangedui

10 − 3 =