Sedert sy hoogtepunt in 2004 verloor die ANC geleidelik steun, en dit is ook met die munisipale verkiesing voortgesit. Dit is ook die eerste keer sedert 1994 dat die ANC minder as 60% van die landswye steun kry. Die ANC het steun verloor, die DA het steun gewen en kon Port Elizabeth by die ANC afneem en het ook beduidend toeneem in die belangrike metropole Johannesburg en Pretoria. In al twee sal waarskynlik koalisies regeer, of onder DA- of onder ANC-leiding. Die vreemde kombinasie van DA en EFF lyk na ‘n moontlikheid as die metropole uit die hande van die ANC geneem moet word. Maar die groot wegholoorwinning vir die DA en die ernstige terugslag vir die ANC, wat die media voorspel het, het nie gebeur nie. Suid-Afrika se politiek is eintlik baie staties en baie vervelig. In ‘n Europese land sou ‘n regerende party wat so droogmaak soos die ANC by ‘n verkiesing geslag word. Die steun wat die ANC verloor het, het ook nie soseer na die DA toe gegaan nie, maar eerder na die EFF en dit is beslis nie goeie nuus vir ons nie.  Die DA se groei is veral deur kleiner partye soos Cope se steun op te raap, en weens die lae stempersentasie in die swart gebiede. Maar ‘n verskuiwing van swartmense uit die middelklas van die ANC na die DA, weliswaar nog nie beduidend  nie, vind wel plaas.

Al die partye het meer links geskuif want dit is waar verkiesings in Suid-Afrika gewen word. ‘n Ideologiese indeling word toenemend moeiliker en partye is meer en meer netwerke om poste te kry en persoonlike loopbane te verseker, ten spyte van die retoriek om die mense te wil dien. Die ANC gebruik gereeld die uitgediende maar onder hulle kiesers hoogs doeltreffende retoriek van wit skuld om van sy eie onvermoë af te lei. Die DA het vir alle praktiese doeleindes ‘n ANC light geword en nog steeds kon hulle nie werklik deurbreek in swart gebiede nie, terwyl wit kiesers (en in die Weskaap bruin kiesers) bankvas agter hulle staan.

Die EFF as nuwe party het goed gevaar, maar het agter hulle eie mikpunte gebly en kon geen enkele munisipaliteit wen nie. Hulle verteenwoordig die populiste, wat geraas maak en nie hoef aanspreeklikheid te aanvaar nie, omdat hulle net in opposisie is. Met talle munisipaliteite waar nóg die ANC nóg die DA die meerderheid het, kan die EFF die beslissende koalisievennoot word en sal dan ook moet uithaal en wys.

Die verkiesing het die ANC se gebruiklike selfvertroue, om nie te sê verwaandheid effens geknou. Die party het nog altyd die fout elders gesoek en blameer alles en almal behalwe hulleself vir enigiets wat verkeerd loop. As die party nou tot selfkritiek bereid sou wees is dit ‘n groot skuif in die Suid-Afrikaanse politiek, maar ek sou nie my geld daarop wed nie.

Die IVP, wat op ‘n afwaartse pad was, het danksy die nie-toelating van die NVP ‘n tweede asem gekry en hulle tradisionele hartland in die noorde van Kwazulu-Natal van die ANC terug gewen. Die Vryheidsfront Plus het aansienlik beter gedoen, moontlik danksy die DA se swart leier en fokus op die swart stemme, maar is as minderheidsparty met baie verspreide steun landswyd geen werklike faktor nie. Om egter onder sulke omstandighede nie net te oorleef nie, maar selfs te groei is op sigself ‘n prestasie.

Die ysterwette van die SA politiek geld, die uitslag ten spyt, nog steeds:

  • Swartmense stem vir die ANC, ongeag wat hulle doen of nie doen nie, oor die swart bevrydingsmitologie. Die ANC sal nog vir lank die dominerende party wees.
  • Witmense bly vir die DA stem, ongeag wat hulle sê, oor die “sterk opposisie” mitologie en oor goeie bestuur van brood en botter sake. Oortuigings speel in die Suid-Afrikaanse politiek al hoe minder ‘n rol en ‘n tradisioneel konserwatiewe en godsdienstige volk soos die Afrikaner is al lankal gemaklik binne ‘n sekulêre en liberale party.
  • Nuwe partye maak opgang kort na hulle stigting en kwyn dan van verkiesing tot verkiesing weg. Ons het dit gesien met die UDM, met Cope, met Agang (wat al met die eerste verkiesing gefaal het en net ‘n mediaverskynsel was). Nou sal ons sien of die EFF hier is om te bly.
  • Die Weskaap is vas in die hande van die DA, die res bly in die hande van die ANC, veral die meer plattelandse provinsies.

Armes en plattelandse mense sal ANC bly stem, ongeag hoe sleg dit gaan. In teendeel, dit wil voorkom asof hulle juis ANC stem as dit sleg gaan omdat hulle dan maklik vatbaar is vir beloftes en vir omkopery met kospakkies en T-hemde. Die ANC kan eintlik nie bekostig om arm mense op te hef nie, want sodra arm mense in die middelklas inbeweeg, word hulle makliker DA-stemmers en verloor die ANC sy steunbasis. Dieselfde geld vir die EFF. Hulle bestaansrede is arm en ontevrede swartmense wat onregverdig behandel voel.

Partye bly etnies gedomineer, ten spyte van hulle retoriek om vir “almal” te wees en hulle uitreik na ander groepe. So het die ANC geen noemenswaardige wit steun nie en krimp die steun van ander minderhede soos bruinmense en Indiërs. Die DA breek nie werklik deur na swartmense toe nie en bly ten spyte van hulle beleid as links-liberale party wat geen etnisiteit ken nie en die smeltkroes-idee meer voorstaan as enige ander party ‘n keuse vir witmense en Wes-Kaapse bruinmense. Veral bly dit ‘n party vir die middelklas, ongeag die tallose veldtogte in arm, swart gebiede. Die IVP, wat hulle nêrens as Zulu-party bemark nie, maar as ‘n soort beter en meer gematigde ANC, se basis bly die meer tradisionele en plattelandse Zululand, soos dit van die begin af was. Selfs die VF+, wat probeer het om ‘n breër minderheidsparty te word en wat blykbaar ‘n hele paar bruin kandidate in die Wes- en Noordkaap opgestel het, kon baie min steun uit die oorde kry en bly afhanklik van Afrikanersteun.

In die Noordkaap is dinge eintlik soos dit altyd is, met alle munisipaliteite wat onder ANC beheer bly en geen beduidende verskuiwings nie. Orania bly uit die Suid-Afrikaanse munisipale verkiesings en die onwaardige gevryery na stemme deur middel van allerhande beloftes uit en kies oudergewoonte sy eie Orania Verteenwoordigende Raad (OVR) met 11 lede, net op ‘n individuele grondslag en sonder partyverbintenis. Die OVR het tot stand gekom op grond van die 2000 hofsaak wat Orania se status as eie plaaslike owerheid bevestig het. Die OVR verteenwoordig nie net aandeelhouers nie, maar alle inwoners van die groter Orania, ook na buite. Dit is ‘n stuk direkte, plaaslike demokrasie, en juis dit is vir die media elke keer vreemd en moeilik om te begryp. Die OVR gaan ook nie oor dienslewering nie (dit word reeds goed hanteer deur Orania Dorpsraad) maar oor die handhawing en uitbou van Orania as selfstandige Afrikanergemeenskap.

16 Comments

  1. Arno

    Goeie opsomming, Sebastiaan. Wat my reeds lankal bekommer en wat ook duidelik was in die aanloop tot hierdie verkiesing is dat hoe meer steun die ANC na links verloor, hoe meer links radikaal neig sy eie beleid in ‘n poging om die populistiese stem te behou. In die verlede was die ANC se etnosentriese anti-wit rassistiese boodskap altyd so half verbloem en moes mens tussen die lyne lees om die naakte waarheid te sien. Deesdae is hierdie retoriek blatant en op die man af: Wittes is vir alle probleme in die land verantwoordelik. Jan van Riebeeck is die vader van al SA se probleme. Direkte rassekwotas word ingestel in sport. Witmense word openlik verwyder uit die aarbeidsmark.

    Die gevare hierin is natuurlik legio. Goed soos grondonteiening sonder kompensasie word onder hierdie bestel ‘n definitiewe opsie.

    Dit sou ver beter gewees het vir almal se welstand indien die ANC ‘n groot persentasie swart steun na die DA verloor het in plaas van na die EFF. Dit sou die ANC se eie beleid baie gemodereer het.

    Soos dinge egter nou staan kan die toekoms baie interessant raak en bepaald nie op ‘n positiewe noot nie.

    Reply
    • Sebastiaan Biehl

      Arno, ek kan net saamstem met jou gevolgtrekking. Daarom dat ons ook nie ons heil in die politiek soek nie en ook nie in die groter ‘almal saam” Suid-Afrika nie, maar glo aan ons eie selfstandige toekoms.

      Reply
  2. Pierre du Toit

    Dit is verstommend hoeveel Blankes hulself daarop roem en daarteen blindstaar dat die DA op ‘n paar plekke die ANC uitgehou of uitgeskop het. Dit verander absoluut niks aan die DA beginsels en ideologieë nie. Die DA verpes blankes (regstellende aksie, SEB, kwotas, ens., ens..). Die DA verpes veral ook Afrikanervolksnasionalisme en selfbeskiking. Met hierdie verkiesing en met die komende DA/ANC/EFF/VF+ koalisiegemors trek my hart nog meer as ooit na Orania toe.

    Daar is egter net een ding wat aan my krap met die OVR en/of sy verteenwoordigde aandeelhouers. Watse tiepe koalisie het Orania/OVR/die aandeelhouers met Soliforum? Ja, ek weet Soliforum is nie ‘n politieke party nie (nog nie), maar hulle bedryf ook politiek en daar is talle ooreenkomste tussen die DA en Soliforum. Ek wil weet want hierdie ding pla baie aangesien ek ook onderandere gesien het hoe Solidariteit, Radio Pretoria so stil stil oorgeneem het en nie net die naam verander het na Pretoria FM nie. Ek het gedurende die vekiesing en aanloop daartoe geluister hoe behep hierdie nuwe SoliRadio is met die DA en verskeie pretensieuse liberale met hulle halfgebakte halwe waarhede.

    Sal iemand by Orania my volledig kan beantwoord? Presies waste koalisie/vennootskap/ooreenkoms het Orania met Solidariteit/AfiForum, of is dit verkieslik ‘n peroonlike aangesig tot aangesig geprek wat ons moet hê? Soos ek sê, my hart trek al lankal Orania toe, maar…

    Reply
    • Cobus Burger

      As ek so luister na almal se insig oor Afrikaners en Boere dan wonder ek maar net hoeveel Afrikaner bloed verniet gestort is omdat die ander dan nou nie die doel wil dien wat ek wil dien nie.

      Hoeveel geld is gebruik om Radio Pretoria op die been te bring. En sonder goeie vermoe sou dit tot niet gegaan het. Daar bestaan die Radio Stasie steeds.

      Ons kan ook ons kinders na die verskillende opleidingsinrigtings stuur wat slegs in afrikaans opleiding verskaf. Nogal wereldklas opleiding.

      Het jy dalk n R3 biljoen rand plan beskikbaar om die Afrikaner te dien.

      Ek wonder maar net.?

      Reply
    • Jaco Kleynhans

      Pierre,

      Die Orania Beweging het ‘n goeie werksverhouding met die Solidariteit Beweging en sy verskillende instellings. Hierdie verhouding is nie formeel volgens een of ander ooreenkomste nie, maar wel prakties in die skep van oplossings vir Afrikanerarmoede, infrastruktuurontwikkeling, opleiding, ens. Ons werk met trots saam met hierdie leidinggewende Afrikanerbeweging.

      Reply
  3. Trevin

    Beide Sebastiaan en Arno se kommentaar is in die kol. Die ANC sal verder links skuif agter die EFF aan, en die DA sal soortgelyks links skuif agter die ANC aan. Dit beteken NIKS goed vir die Afrikaner nie.

    Die moontlikheid dat die DA en die EFF saam in Pretoria moet regeer is ‘n tamaletjie…die EFF kan baie maklik die DA in alle rigtings dwing wat die DA gaan vervreem van die witstem wat so hardnekkig stem vir die DA op die grondslag van pragmatisme (in plaas van integriteit, beginselvastheid en geloof).

    Ek wonder somtyds of daar nog wel ‘n Afrikanervolk is, want my uitkyk en skatting van die situasie wat ons onsself nou in bevind is heeltemal teenoorgesteld van hoe die deursnee Afrikaner die situasie opsom. Daar blyk ‘n gevoel van opgewondenheid en optimisme by die Afrikaners te wees (saam met al die ander wit liberales) dat die DA so baie vermag het in die verkiesing. Ek, in teenstelling, het ‘n gevoel van bekommernis dat die drie groot partye maar nou net nog meer liberaal en links gaan raak, en op ‘n vinniger pas soos wat hulle mekaar gaan probeer troef vir die 2019 verkiesings.

    Die linksheid en liberalisme strook glad nie met my nie, en ek hoop daar is meer as ‘n handjievol Afrikaners wat nog so dink.

    Reply
    • Sebastiaan Biehl

      Trevin, ek voel dieselfde. Dit is wel goed dat die ANC se absolute houvas op die mag effens verbreek is, maar nie een van die ander alternatiewe maak my opgewonde nie. Ons kan net hoop dat die mense op grondvlak gestem het vir beter munisipaliteite en nie vir een of ander ideologie nie. Maar in Suid-Afrika is die munisipale verkiesing, wat in meeste ander lande min aandag trek, deel van ‘n groter geveg oor die mag en die hulpbronne.

      Reply
  4. Ben

    Hoekom stem bruinmense in die Noordkaap nie ook DA nie? Hulle praat tog Afrikaans as moedertaal? In watter mate beinvloed dit ‘n volkstaatgedagte negatief?

    Reply
    • Sebastiaan Biehl

      Ben, die ANC in die Noord-Kaap is minder radikaal as in die res van die land en die Noord-Kaap is ook ‘n sterk landelike en arm provinsie en die ANC is sterk in die platteland en onder arm mense. Die Wes-Kaapse bruinmense is ekonomies verder ontwikkel as diegene van die Noord-Kaap en ook polities meer bewus. Verder was die Wes-Kaap nog altyd nie-ANC (eers NP, toe DA), so die “veilige keuse” is dus om te stem vir die grootste en bekende party. In die Wes-Kaap is dit die DA, in die Noord-Kaap die ANC. Die mense, ook die bruinmense, is konserwatief in die sin dat hulle bly by die bekende, en dit is die ANC. Ons moet ook nie die fout maak om te dink dat die DA enigsins “ons mense” is en enige simpatie of begrip vir selfbeskikking het nie. Juis die teendeel, hulle is die party wat seker etnisiteit die meeste ontken. Die ANC los Orania eintlik in ‘n groot mate uit, terwyl die DA waarskynlik ‘n punt sal probeer maak deur met Orania te karring.

      Reply
      • Jan Malan

        Sebastiaan daar is ook tog die siening van mense wat nie demokrasie verstaan nie dat as hy of sy vir ‘n party stem wat nie die meerderheid kry in ‘n verkiesing nie hulle self verloor. Die teendeel is tog die waarheid dat jy juis verloor as jy nie vir ‘n party stem wat jou sal verteenwoordig nie.

        In die groot stede is die mense meer bloodgestel aan wat demokrasie beteken en darom sal jy juis verkuiwings daar verwag en dit kan dan ook met hierdie verkiessing gesien word soos jy dit uiteen gesit het.

        So die Noord-Kaap sal ANC hartland bly tot daar ‘n bevolkings verkuiwing kom en dan kan dit heel moontlik sterk verkuif na VF+ of ander regse party. Dan sal die mense net op die selfde vlak van opvoeding gehou moet word anders sal hulle dalk ook DA begin stem.

        Dit is dus nou belangrik dat ons moet begin met vestiging van ons mense in die Noord-Kaap, om die Noord-Kaap as provinsie te regeer is nie onmoontlik nie maar dit gaan werk kos.

        Reply
  5. Pieter van Niekerk

    Sebastiaan, ek geniet altyd jou skrywes en sien daarna uit om jou weer in Desember te ontmoet oor ‘n koppie koffie.

    Terug na die verkiesing, partypolitiek en ons Afrikaners.

    Ek het ongelooflike deernis met die Afrikaners van Orania en hul strewe na selfbeskikking.

    Maar

    Ongelukkig is daar harde realiteite. Een realiteit is dat die blankes van Suid-Afrika nooit weer deur diskriminerende wette beskerm sal word nie. Inteendeel, daar word tans onbeskaamd teen blanke seuns en dogters gediskrimineer deur middel van regstellende aksie en sogenaamde ‘employment equity’.

    ‘n Ander realiteit is dat Suid-Afrika doodgewurg word deur die ANC se kader-ontplooiing en korrupsie sonder grense. As die ANC se houvas nie gebreek word nie, sal die aanstelling van onbevoegde persone in sleutelposisies en korrupsie wat die land jaarliks miljarde rande kos, maar net voortgaan, ongeag wie die president is.

    ‘n Derde realiteit is dat dwergpartye soos die VF+ (hoe rein en edel die motiewe ook al) geen kans het om die houvas van die ANC te verbreek nie.

    ‘n Vierde realiteit is dat slegs een party, naamlik die DA, hoegenaamd ‘n kans het om die ANC as reegerende party te vervang. Hoekom? Die DA se magsbasis is versprei oor al die rassegroepe van Suid-Afrika. Ja, die DA is ver van volmaak. JA, die DA neem soms strategiese besluite waarvan ek persoonlik nie hou nie. Ja, sommige van die DA se leiers laat jou wenkbroue lig. Maar wat is die alternatief?

    Het dit nie tyd geword dat die Afrikaners saamstaan en hul vertroue in die DA plaas nie? Het dit nie tyd geword dat die Mulder broers en hul volgelinge in belang van van die Afrikaner die DA hul tuiste maak nie?

    Groete tot later

    Reply
    • Hannodb

      Hallo Pieter.

      Ek verskil van die “realiteit” stellings wat jy maak in punt 3 en 4, omdat hierdie stellings nie rekening hou met die proporsionele kiestelsel wat ons het nie.

      Alhoewel ons ‘n proporsionele kiestelsel het, stem die blanke kiesers nog steeds asof dit ‘n suiwer kiesafdeling stelsel is, en die DA buit natuurlike hierdie kiesers naiwiteit uit tot hulle eie voordeel.

      Die waarheid is egter dat ‘n volwasse kiesstelsel een is waarin geen party die algehele meerderheid vorm nie. Hangrade, en selfs hang provinsies en ‘n hang regering moet die norm word, eerder as die uitsondering. Die voordeel hiervan is dat dit partye wat uiteenlopende belange dien, dwing om saam te werk as hulle wil regeer. Dit dwing hulle om begrip te ontwikkel vir ander se standpunte en mekaar so ver moontlik te gemoet te kom, sodat hulle self ook iets uit die ooreenkoms kan kry. Die laaste ding wat ‘n land met soveel uiteenlopende en botsende belange nodig het – is ‘n tweeparty stelsel. In so stelsel sal minderhede vervreemd voel, want altwee partye sal “vir almal” wees, en dus hulle belange vertrap ter wille van meer stemme uit die groter groepe. Dit kan net lei tot groter kieser apatie.

      Die teendeel is egter dat klein partytjies, soos die VF+, dikwels die koningmaker tussen groter partye moet wees. As ‘n groot party te min steun het, soos in baie munisipaliteite, moet hulle in koalisie met ‘n klein party gaan. Dit gee daardie klein party disproporsionele invloed in die regering van die stad. Sodoende kan die belange van minderhede beter gedien word.

      Hierdie land is vir te lank deur eenparty regerings op gemors: Eers die Sappe, toe die Natte, en no die ANC. Elke keer is dit ‘n gemors. Die laaste ding wat ons nou wil he, is om dit met nog ‘n eenparty regering te vervang – a ANC-lite regering. Dis tyd dat ons die proporsionele stelsel benut soos wat hy bedoel was, en koalisie politiek bevorder.

      Reply
  6. Jan Greeff

    Pieter al voordeel wat ek in die opgang van die DA sien is die feit dat hulle effe meer aandag aan dienslewering as aan korrupsie gee. Dit in sigself is egter ‘n beduidende stap vorentoe wat ons sukkelende ekonomie betref, soos ook reeds sigbaar geword het in die waarde van die Rand.

    (On?)gelukkig is ek ‘n tradisionalis wat my stem ter will van beginsels uitbring en dus steeds vir die VF+ stem omdat dit die enigste party is wat op volwaardige wyse Christelike beginsels nastreef sonder om dit as ‘n stemwerwingsfoefie aan te wend soos wat die sogenaamde christenpartye (in opposisie teen mekaar) doen.

    Vir my is die kernsaak dat ons as Volk vergeet het van 16 Desember 1838 en al hoe meer die leuen glo dat ons redding elders te vinde is.

    Welke ander rede as dat ons die leuen wil glo, sal ons kan aanvoer vir ‘n strewe om ons beginsels prys te gee en ons heil by die DA te gaan soek?

    Reply
    • Pieter van Niekerk

      Jan, as belydende christen behoort ek aan ‘n kerk wat suiwer christelike beginsels nastreef. Enige kompromieë is onaanvaarbaar.

      Ek stem egter vir ‘n party wie se leier die belange van ALLE Suid-Afrikaners (insluitend nie-christine soos o.m. Jode, Hindoe’s, Moslems en ongelowiges) op die hart dra. Onder die leierskap van Mmusi Maimane glo ek, nee weet ek, dat Suid-Afrika gered sal word uit die moeras waarin die ANC ons gedompel het.

      Maimane kan dit nie op sy eie doen nie. Hy is ook maar soos ons almal afhanklik van God se genade. Daarom is is dit belangrik dat ons vir hierdie jong staatsman (en beleidende Christen) voorbidding doen dat God aan hom die nodige wysheid en krag gee om sy belangrike taak tot die beste van sy vermoëns te vervul.

      Ten slotte, ek verskil van jou polities, maar ek het tog groot waardering vir jou Afrikaner nasietrots.

      Groete

      Reply
      • Hannodb

        Hallo Pieter.

        Ek dink egter jy bluf jouself. Daar is vele botsende belange in hierdie land, en geen party kan “Alle Suid-Afrikaners” dien nie. Enige party wat dit voorgee, sê daarmee dat HULLE die reg het om te besluit wie se regte en belange belangriker is as ander sin, en wie se belange op die agenda geplaas sal word, en wie nie. Hoe sal die party hierdie besluit neem? In party-belang, natuurlik. Maw, die party dien die belange van die bevolkingsgroep wat die meeste getalle het, ten koste van die minderheidsgroepe. ‘n Party soos die DA sal al meer die Afrikaners vervreem namate hulle getalle groei.

        Ek dink jou besluit om vir ‘n “party vir almal” te stem, kom uit onkunde oor hoe die proporsionele stelsel veronderstel is om te werk. Hangrade is veronderstel om die reel te wees, eerder as die uitsondering. Solank daar ‘n party is wat 51% steun in die land het, is die stelsel disfunksioneel. Ons het juis ‘n verskeidenheid partye nodig, elk wat ‘n spesifieke belangegroep dien, en elk wat minder as 50% kry. Sodoende word hierdie partye dan geforseer om met mekaar saam te werk. Partye wat bereid is om na ander te luister, ander te respekteer, en met ander te onderhandel – soos die VF+ – sal dan ook die vrugte pluk wanneer ander partye hulle ook tegemoet kom. Maar partye wat magsdronk is – soos die ANC, DA en EFF – en nie mooi met ander wil saamspeel nie – sal dan hulleself toenemend op kantlyn vind. Dit is die toekoms waarna ek streef, en daarom sal ek skaamteloos bly stem vir my eie belange, al is ek deel van ‘n minderheid, of liewer, JUIS OMDAT ek deel is van ‘n minderheid.

        Reply
  7. Willem Westraad

    Pieter, kerk en politiek loop nooit saam nie. Politiek gaan oor eie gewin en daarom word mense vermoor om net ‘n ou joppie te kan kry om te kan dien op ‘n raad. Die DA volg dieselfde beleid as Mbeki en is net ‘n voortvloeisel van die Mbeki ANC. As jy jou Afrikanerskap wil uitleef, om van Suid Afrika ‘n beter plek te maak, moet jy net soos die politiekkuste, hul uitbuit soos wat hulle jou uitbuit. Indien jou wyk op munisipale vlak deur ‘n party regeer word wat nie behoorlike dienste lewer nie, stem dan vir die ander groot party. Wanneer jy egter op Nasionale vlak stem, stem jy vir die party wat jou eie ideale nastreef. Indien die VF+ moet verdwyn op die politieke speelfront, kan jy maar jou goedjies pak en oorsee ‘n heenkome gaan soek. Die VF+ verseker dat daar ‘n gelykmatige speelvlak is op politieke vlak en die Afrikaner word nog verteenwoordig. Ek haal my hoed af vir die Mulders en sal hulle altyd op Nasionale vlak ondersteun. Los die Mulders in die parlement, hulle is ‘n goeie teenvoeter vir die EFF van Malema en sorg dat ‘n ewewig gehandhaaf word. Sterk nasietrots en het niks verloor om na ‘n volksvreemde land te trek.

    Groete

    Reply

Submit a Comment

Jou e-posadres sal nie gepubliseer word nie.

3 + 7 =