cygne chanteur Whooper Swan Cygnus cygnus cygnusGedurende die laat 1980’s het die Afrikaner Volkswag, toe nog ‘n groot en gedugte Afrikanerkultuurorganisasie die volgende, pragtige slagspreuk gebruik: “Winter haal nooit ‘n trekvoël in nie.”

Verlede week ontketen die liberale denker, skrywer en uitvoerende hoof van die Suid-Afrikaanse Instituut vir Rasseverhoudinge, Dr Frans Cronje, ‘n debat nadat hy in ‘n onderhoud noem dat hy dink dit vir Suid-Afrikaners nodig is om ‘n Plan B te hê. Sy Plan B behels om te emigreer. Selfs vir Cronje is die omstandighede in Suid-Afrika besig om so vinnig agteruit te gaan dat ‘n Plan B nodig is.

Toe die Afrikanervolkswag in die laat tagtigerjare gesê het dat die winter nooit ‘n trekvoël inhaal nie het hulle eintlik ‘n visionêre boodskap aan Afrikaners gelewer. Suid-Afrika sou verander. Die politieke veranderinge van die vroeë 1990’s was onstuitbaar, maar hierdie veranderinge sou van Afrikaners vereis om soos talle kere in sy verlede weer op te pak en te trek.

Verskeie navorsingsprojekte het die afgelope paar jaar probeer bepaal hoeveel Suid-Afrikaners en in besonder Afrikaners sedert die vroeë 90’s die land verlaat het. Party instellings beweer dat tot soveel as 800 000 of selfs 1 miljoen blankes emigreer het. Enigiets tussen 500 000 en 800 000 Afrikaners het waarskynlik groener weivelde gaan soek.

Die Afrikaner is tereg soos wat die Afrikanervolkswag beweer het, ‘n trekvoël. Die nuwe Groot Trek wat die afgelope 25 jaar plaasgevind het, was egter nie net ‘n trek na oorsese bestemmings nie. ‘n Studie van die laaste drie sensusopnames toon duidelik dat daar die afgelope paar jaar ook binne Suid-Afrika groot bevolkingsverskuiwings onder Afrikaners plaasgevind het. Gaan ry maar net deur ‘n klein plattelandse dorp en die enorme afname in die Afrikanerbevolking is duidelik sigbaar. Jong Afrikaners het selfs in groter getalle die afgelope tyd na skool na die groter stede verhuis. Min Afrikaners bly op die platteland oor. Plase word gekonsolideer en so word die aantal boere ook minder.

Ouer mense trek na die relatiewe veiligheid en steeds hoë vlakke van dienslewering wat in die Wes-Kaap ervaar kan word. Baie ander gaan na die stede om naby aan hul kinders en goeie mediese dienste te wees. Die veranderende demografie van die Wes-Kaap en al die groot stede maak dit egter slegs tydelike oplossings.

Selfs ook binne stede trek Afrikaners uit sommige woonbuurte na ander. In elke groot stad in Suid-Afrika is daar vandag voormalige Afrikanerwoonbuurte waar byna geen Afrikaners meer woon nie.

Sonder dat Afrikaners dit noodwendig besef staan hierdie verskuiwings van die afgelope paar jaar in die gees van konsentrasie. Daar waar Afrikaners in woonbuurte konsentreer kan taal, kultuur en tradisies behoue bly.

Die winter is al vir bykans 25 jaar besig om Afrikaners in te haal. En sonder dat ons dit besef het, het ons soos goeie trekvoëls bly oppak om van die koue te ontsnap. Die Afrikanervolkswag se slagspreuk het natuurlik na ‘n meer volhoubare trek verwys. Indien Afrikaners nie hierdie trek in die volgende paar jaar begin maak nie mag die winter hom dalk net inhaal. Meer van ons mense moet vinniger in Orania kom vestig.

36 Comments

  1. Anthony

    Puik artikel Jaco. Kom ons vertrou dit gaan baie Afrikaners bereik……soooooo belangrik!

    Reply
  2. Theuns

    Die uitermatige hoe koste van behuising in Oranai maak dit onmootlikl om soontoe te trek. Dis net vir die rykes wat ook nie ‘n vaste werk nodig het nie. Almal is nie messelaars en hande arbeiders vir bouprojekte nie…Orania bied nie hoop aan arm en middelklas Afrikaners nie.

    Reply
    • Jaco Kleynhans

      Theuns,

      Wat jy hier skryf is totaal en al onwaar. Die groter meerderheid van Orania se inwoners verdien R5000 of minder per maand. Hulle maak almal ‘n goeie, basiese lewe. Die realiteit is dat nie almal huise kan bekostig nie. Daarom is hier goeie huureiendom in Orania. ‘n Ontwikkelaar het sopas weer 8 huise vir verhuring gebou. Hierdie netjiese gesinshuise word teen R3500 per maand verhuur. Die Helpsaamfonds bou ook voortdurend nuwe behuising wat teen baie lae tariewe uitverhuur word. Ons nuutste projek die Soetdoring-woonstelle se eerste fase is sopas voltooi en tweeslaapkamerwoonstelle word teen R1700 per maand verhuur.

      Wat die huismark aanbetref is dit belangrik om appels met appels te vergelyk. Dit help nie ‘n mens probeer huispryse in Orania met sukkelende en falende plattelandse dorpies se pryse vergelyk nie. Orania is ‘n suksesvolle,groeiende dorp waar die vraag konstant die aanbod oorskry. Orania se pryse moet dus met groeiende suksesvolle plekke vergelyk word. In daardie opsig lyk ons pryse nie so sleg nie. Natuurlik is die beste antwoord hierop die bou van meer eiendom, maar in Orania glo ons juis dat die vryemark dit sal uitsorteer.

      Jou opmerking dat Orania nie hoop aan arm en middelklas Afrikaners bied nie, dra geen water. Dit is om die waarheid te sê eintlik ‘n belediging vir elke arm en middelklas Afrikaner wat die afgelope tyd hier gevestig het. Ons sal jou egter graag in die volgende paar jaar verkeerd bewys. Orania beleef tans die beste groei nog.

      Reply
  3. Theuns

    Die uitermatige hoe koste van behuising in OranIa maak dit onmooNtlik om soontoe te trek. Dis net vir die rykes EN DIE wat ook nie ‘n vaste werk nodig het nie. Almal is nie messelaars en hande arbeiders vir bouprojekte nie…Orania bied nie hoop aan arm en middelklas Afrikaners nie. Die uitsluiting van mense deur finansies is die hoofrede waarom Orania nie groei nie. Daar is nie bekostigbare behuising in Orania nie. Punt.

    Reply
  4. Frik

    Theuns

    Moenie so negatief wees nie. As behuising baie beskikbaar is, betaal jy goedkoop. As dit nie beskikbaar is nie, betaal jy duur. Dit is die ekonomiese Kapitalistiese bestel waarvan Oranie deel is.

    Ek kan self ook nie bekostig om na Orania te trek nie. Ek is ‘n ingekrewe buitelid en stort maandeliks geld in die Orania Groeifonds met die begeerte om eendag daarheen te verhuis. Ek besoek Orania ten minste twee keer per jaar met vakansie, al is dit net vir ‘n lang naweek. Ek het my hart daar verloor, want dit is my Afrikaner mense wat my taal, kultuur, geskiedenis, tradisies, en Godsdiens deel. Daar is nie goedkoop arbeid nie, maar ek is mal daaroor om self te werk. Ek kan ook nie messel en sommige ander handearbeid doen nie. Maar ek kan WERK.

    As jy na die groei kyk in Orania, veral die laaste paar jaar, sal jy die passie van bogenoemde in die Bestuur en al die mense sien. Dit is hierdie mense (ook myne) se DROOM en word absoluut profesioneel en modern bestuur. Niks is agtertangs nie. Geen hovaardigheid of meerderwaardigheid nie. Mense gee vir mekaar om.

    Theuns, sluit aan by die Orania Beweging. Besoek Orania en gaan op ‘n begeleide toer. Ontvang al hulle korrespondensie. Leef jou in in dit wat hulle doen en word deel daarvan. Jy sal nooit weer omdraai nie! DIT IS AS JOU HART REG IS!

    Theuns, ek stoei nie met jou nie. Dit is my wens dat jy Orania sal besoek en dat jy ook jou hart sal verloor!

    Groetnis en mooi dag!

    Reply
    • Sebastiaan

      Frik, dis ‘n riem onder die hart om sulke positiewe opmerking van uitwonders te kry. Ons waardeer julle en julle bydrae.

      Reply
    • Arno

      Pragtig, Frik. Ek is min of meer in dieselfde bootjie as jy en beplan al reeds jare my “great escape” hier vanuit Pretoria. Met genade van Bo sal ek en my gesin nog ook eendag ‘n plekkie in Orania hê om ons eie te noem.

      Reply
  5. Jan Joubert

    Ons wil mense trek. “Wat jy hier skryf is totaal en al onwaar” Ons kan Afrikaners hiernatoe trek indien ons hulle wil bemagtig. As jy agt huise bou het jy agt meer stemme vir die direksie en het jy agt huishoudings sonder bemagtende stemme. As jy huise vir R3500 per maand verhuur en mense verdien R5000 per maand en jy betaal ‘n gemiddelde Dorpsraadrekening, gee ‘n kerkbydrae, koop kos, koop klere by die kleretrommel, koop Twizza vir die werk in die son en betaal jou fietspaaiement dan is daar ‘n heenkome geskep terwyl ander in hul lugreeling sit en artikels skryf.

    Reply
    • Jaco Kleynhans

      Meneer Joubert,

      Sê u dus dat beleggersnie huurhuise mort bou nie? U sommetjies is lelik verkeerd. ‘n Paartjie wat so ‘n huis (my voorbeeld) vir R3500 huur verdien saam minimum R10 000 per maand. Dan bly daar R6500 na huur oor waarmee hulle ‘n relatief goeie lewe kan maak.

      Wat mense aanbetref wat heelwat minder aanbetref het mense soos ek (dié wat nou in kantore met lugreëling sit) die afgelope 5 jaar meer as R10 miljoen ingesamel deur die land vol te ry en debietorders rn eenmalige bydraes te werf. Hierdie geld is aangewend om gesubsidieerde behuising vir sowat 100 mense daar te stel. Die nuutste is die Soetdoring-woonstelle waar gesinne ruim woonstelle teen R1700 per maand huur. Dit word gehou slegs vir mense met ‘n baie klein inkomste.

      Natuurlik is eienaarskap belangrik. Die Orania Dorpsraad in samewerking met die Helpsaamfonds het sopas ‘n selfbouprojek geloods waar mense gehelp sal word om gesubsidieerde bekostigbare erwe te bekom en kan self huise daarop te bou. So gaan van daardie werkers in die bouspanne hul eie huise kry.

      Ons werk onderpoos om nog maniere te vind om eienaarskap aan te moedig.

      Wat doen u om volhoubare vestiging in Orania moontlik te maak of verkies u om maar net te kritiseer?

      Reply
      • Jaco Kleynhans

        Jammer vir tikfoute. Ek het op selfoon getik.

        Reply
  6. Jan Joubert

    Ek probeer aandui dat jou finale woordgebruik glad nie verband hou met die werklikheid nie. Sirkuleer gerus ‘n omsendbrief deur Orania waarin jy noem dat die minimum inkomste per egpaar R 10 000 per maand is.

    Ek het ook nie ‘n debat gevoer oor die beginsel van huurhuise nie, maar oor bemagtiging van Afrikaners in Orania. ‘n Mens noem jou tegniek ‘n strooipop wat jy self skep en dan val jy die strooipop aan.

    Ek beweer dat om mense hier te bemagtig veeleer ‘n aantrekkingskrag vir Afrikaners sal wees as ons wonder hoe om Afrikaners hier te kry. Is ons besig om aan ‘n klein groepie al die mag te gee of bemagtig ons die Afrikaner wat na allerlei trauma daar buite hierheen kom om nuut te begin.

    Die gesubsidieerde erwe waarvan jy praat is volgens my inligting vir mense wat reeds R 200 000 sterk is. Is dit korrek?

    Ten opsigte van jou vraag wat ek doen. Vra sommer vir Sebastiaan, hy het onlangs ‘n onderhoud met my gevoer. Meneer.

    Reply
    • Jaco Kleynhans

      En waar het ek beweer dat die minimuminkomste R10 000 is? Ek het gesê die mense wat in die genoemde huurhuise woon verdien soveel per paartjie. Wat die erwe aanbetref is dit totaal onwaar. Kry gerus die feite. Dit is jammer dat die mense wie se planne nie altyd uitgewerk het nie so graag die wie se planne wel uitwerk aanvat. Die Jacobs-egpaar wat die huise in Robynlaan gebou het kon elders ‘n veel groter opbrengs op hul geld gekry het. Hulle het egter in Orania kom inploeg om hier ‘n verskil te maak. Om huise vir byna R800 000 te bou en dan vir R3500 uit te verhuur is tog seker nie gulsig nie. Wat jou bewering oor stemme aanbetref kan ek net sê dit is lagwekkend.

      Reply
    • Johan

      Jan, besef jy dat jou boodskappe vir ‘n buitestaander soos ek, slegs na ‘n geskoorsoek en effens onsamehangend klink?

      As jy dan mag begeer, om self die Groot Een te word wat die kitaar slaan soos niemand anders kan nie, en die plan en vermoë het om ‘n gesinsinkomste tot R20 000 op te stoot, reken ek dis uiters selfsugtig van jou, om jouself nie onmiddelik verkiesbaar te stel vir elke moontlike gesagsstruktuur, en dan deur Machiaveliaanse politiekery jouself bekroon te kry as die Capo del Tuti Capo van Orania nie.

      (en net ter inligting….ek dink ‘n onlangse opname deur Solidariteit het bevind dat die gemiddelde inkomste per Afrikanerhuishouding R11 000 ‘n maand is – dit beteken helfte vam huishoudings is onder R11k. Vir die Karoo sou R10k derhalwe uitstekend wees)

      Reply
  7. Jan Joubert

    Weer ‘n strooipop! Ek het niemand se planne aangevat nie. Ek het geskryf oor bemagtiging. Verduidelik dan ook asseblief jou weergawe van hoe aandeelblokke en huurhuise stemme beinvloed en hoe dit Afrikaners bemagtig.

    Reply
  8. Sebastiaan

    Daar waar mense is, is daar altyd ‘n mate van ongelykheid. Party is meer gelukkig as ander, party werk harder as ander, party is meer geslepe as ander. Dis iets wat ons moet aanvaar. Daar is seker talle mense wat my beny oor my lewe, en net so is daar talle ander wat my as ‘n sukkelaar beskou, dit is alles ‘n kwessie van perspektief. Pleks om mense in Orania te vergelyk moet ons eerder mense se lewensomstandighede elders vergelyk. Niemand van die wat as armes hier aankom is slegter af nie, in teendeel, hier is maatskaplike hulp en gesubsideerde behuising, maar ook en veral werk. Vergelyk dit eerder me die onwaardige, onveilige en vernederende bestaan as arm Afrikaner elders in die land.

    Reply
    • Quintin Diederichs

      Goeie punt Sebastiaan. Ons gaan baie entrepreneurs lok as ons ‘n meer gunstige beleggingsklimaat het (m.a.w. minder fooie en rooilind), ‘n effektiewe sake netwerk opstel wat aktief uitgaan en afset vir ons dienste en produkte kry en bowe al vir die sakelui meer inspraak gee in terme van ekonomiese ontwikkeling, reels en regulasies m.b.t. die private sektor ens. Binnekort sal ons dan nie voorbeelde hoef te gebruik van enkele miljoeners wat elders baie meer geld sou kon maak nie, maar tog teen die beginsel van gesonde wins kies om in Orania te bele om die saak te bevorder nie. Dit mag dalk edel wees, maar sulke retoriek skrik voornemende beleggers af.

      Reply
  9. Quintin Diederichs

    Interessante gesprek, alhoewel ek bieg dat ek elke keer sidder wanneer ek die woord subsidie uit ‘n amptenaar se mond hoor! Iemand moet vir subsidies betaal, en glo my – 10 miljoen is ‘n druppel in die emmer wanneer mens daai roete wil innneem.

    Ons voorvaders het as “trekvoëls” hier aangekom in die 17de en 18de eeue. Afrikaners het deur die eeue heen bewys dat ons geneig is om van ons probleme af weg te trek, of selfs weg te hardloop. Sommige van ons het besef dat ons ‘n laer moet trek waarvandaan ons kan floreer en die storms kan trotseer. Dit was seker ook die gedagte met die ou Boere Republieke en toe later die RSA… net jammer ons was elke keer die minderheid in ons eie laer en was genee om vir die meerderheid te vertel hoe hulle ons laer vir ons moet bou!

    Hoe dit ook al sy, die Afrikanervolkswag het in die 80’s en vroee 90’s nog ‘n goeie slagspreuk gehad… iets in die lyn van “op trek na ons eie”. Dit wil se ‘n oproep tot ‘n laaste Groot Trek – hierdie keer na die volkstaat. Orania is geskep as die eerste groeipunt van ons volkstaat (lees laer). Of die Afrikaner nog ‘n Groot Trek in hom het of nie is ‘n ander saak. Ek kies egter om positief te bly en ekonomiese geleenthede te skep wat meer volksgenote in ‘n finansiele posisie plaas om na die volkstaat te verhuis.

    Wat Jan Joubert se standpunt aanbetref, moet ek erken dat hy die spyker op die kop tref. Dit voel seker fantasties om jou eie stert te prys met al die miljoene wat jy insamel vir nuwe gesubsidieerde behuising vir behoeftige blankes (vir die Hanlie Retiefs en Tobias Lindners se vermaak), maar op die einde van die dag spreek jy steeds nie die werklike probleem aan nie: die meerderheid ekonomies aktiewe Afrikaners kan nie dieselfde salarisse in Orania verdien as wat hulle tans elders verdien nie en hulle is eenvoudig nie bereid om hul relatief gemaklike leefstyl aan te pas deur minder in Orania te kom verdien nie. Frans Cronje en die res van die volk se plan B is dus nie die volkstaat nie.

    Die oplossing is om die kool die sous werd te maak vir die middelklas Afrikaner – en in besonder die ondernemende tipe. Dis die mense wat die kapitaal en idees het om werk te skep vir die werkersklas. Ek stem nogal saam met die Thatcher benadering met betrekking tot die armes wat hulself uit die ellende moet uit werk met so min as moontlik subsidies van die owerheid se kant af.

    Die oplossing is beslis nie om ‘n kultuur van afhanklikheid deur subsidies te skep nie, en nog minder om mense se koppe af te byt as hulle geldige punte in hierdie verband uitlig nie.

    Jaco, die aard van jou amp vereis tog dat jy eerder die “trekvoëls”, synde Jan Joubert, die uwe en vele ander wat reeds in Orania geland het, moet koester, ongeag of ons van jou verskil of nie. Wat doen jy om ons en ons bydraes te koester, of verkies jy net om ons te kritiseer? Dalk besef jy net nie watter reuse bydraes ons al gemaak het en steeds maak nie… gaan dink daaroor en kalmeer tog net ‘n bietjie asb.

    Reply
  10. Ludwig Everson

    Volhoubaarheid moet nie slegs gemeet word in terme van ekonomiese kostes nie. Daar is drie aspekte waarna gekyk moet word.

    1. Ekonomie
    2. Gemeenskap
    3. Omgewing

    So punt een dit is goed dat mense die kans gegun word om huur huise te kan kry. Ek is ‘n voorstaner van huurhuise. Dit is ‘n onvolhoubare situasie om te dink almal gaan huise kan koop. In geen van ons stamlande gebeur dit nie. Dit beteken dat ons ook kyk na ons gemeenskap.

    Ongelukkig is daar wel een grooooot verskil met ons stamlande in die verband en dit is dat huurders in ons stamlande het net soveel stem soos ‘n huiseienaar. Ongelukkig is dit so dat hoe meer eiendom jy in Orania besit, hoe meer stemreg het jy en dit is ook ‘n onvolhoubare situasie. Aan die punt moet Orania baie snel aandag aan gee.

    Met ander woord die eienaars van al die huurhuise het die stem reg en die huurders se lewe in hulle hande. Meeste mense sal met my saam stem dat dit nie volhoubaar as ons praat van waar ons ‘n volkstaat wil bou met alle soorte mense nie.

    Reply
    • Jaco Kleynhans

      Beste Ludwig,

      Dankie vir jou bydrae. Ek dink ons kan nog lekker gesprek voer hieroor. Ek stem ook saam dat dit onmoontlik is om te verwag dat almal eiendom moet besit. Dit gebeur bykans nêrens. Hoe ons die vraagstukke van stemreg in die toekoms gaan uitbou binne die beperkings van ons regsvorme is ‘n goeie vraag. Ons werk ernstig daarmee by die Orania Dorpsraad en implementeer binnekort ons eerste remedie naamlik ‘n gekoöpteerde direksielid wat spesifiek deur nie-aandeelhouers aangewys sal word. Ek weet jy is byvoorbeeld ‘n aandeelhouer by Kambro. Weet jy of Kambro vorder met die vraagstuk van stemreg vir mense wat op Kambro-grond huur?

      Laastens. Ek stem 100% saam met die belangrikheid van gemeenskap en omgewing. Ek dink juis dit is die oordrewe fokus op ekonomie wat in baie gevalle tot die vernietiging van die Westerse beskawing lei. Daar is talryke voorbeelde van gemeenskappe in ander wêrelddele waar gemeenskap en ekonomie ‘n groter rol in mense se geluk speel. Ek dink vinnig net aan Butan in Asië.

      Reply
      • Ludwig Everson

        Wat nodig is, is ‘n owerheid (Orania Metro) wat oorhoofs mag kan uitoefen oor alle Orania owerhede (VAB, 272, VKN en Kambro), waarvoor almal kan stem.

        In die interim kan die stemreg (volmagte) van die huurhuise eienaars oorgedra word aan die huurders. Dit is nou as die huurhuise eienaars erns het met Orania se huurders en hulle nie die huurders beskou as slawe of tweedeklas se inwoners nie.

        Jy is reg oordrewe fokus op ekonomie vernietig baie en veroorsaak soms meer maatskaplike en ekologies probleme as wat nodig is. Deur ‘n waarde te plaas op die feit dat ‘n persoon ‘n Afrikaner is, sal help dat ons meer mense kan behou in Orania. Miskien sal ons ook dan meer moeite doen om uit te vind waarom sommige mense weg gaan.

        Reply
  11. Dante'

    Gesubsidieerde behuising op Orania het talle voordele. In die eerste plek is daar mense in Orania wat anders moontlik nie daar sou kon wees nie. Tweedens is n subsidie op behuising ‘n inspuiting vir die hele dorp se ekonomie omdat daar nou meer mense is wat meer geld het om te spandeer op die besighede op die dorp. Indirek word nie net die behuising nie maar ook die klerewinkels, restaurante, kroee ens ens ook gesubsidieer deur geld van buite Orania. Dit is tog wat nodig is om ‘n dorp se ekonomie aan die gang te kry aan die begin. In die verlede het semi-staatsinstellings hierdie rol vervul. Hoeveel Afrikaners was nie afhanklik van behuising van instellings soos eskom, iskor, die weermag, transnet ens nie? Dit is beslis nie ‘n langtermyn oplossing nie maar dis wat nodig is om die ekonomie aan die rol te kry.

    Reply
    • Jaco Kleynhans

      Danté,

      Jy slaan die spyker op die kop. Sonder hierdie soort behuising sal Orania tans nie kan groei nie. Ons wens almal die privaatsektor sal uiteindelik aan almal se behuisingsbehoeftes kan voldoen, maar tot dan moet ons (die Helpsaamfonds is egter ook privaat en nie ‘n staatsinstelling nie!) met ons huidige projekte voortgaan.

      Reply
  12. Dante'

    Quintin, die waarskynlike rede hoekom Frans Cronje se plan B of C nie ‘n volkstaat insluit nie is omdat hy “Afrikaner-nasionalisme afstootlik vind”. Sy eie woorde. Landbouweekblad 25 Oktober 2013

    Reply
  13. Jan Joubert

    Johan dit is seker waar dat ek skoorsoek. Terloops, dankie vir al die eretitels! Orania is ‘n paar maatskappye. Grondeienaars in die verskillende maatskappye wys hul direksies of besture aan. Baie grondeienaars bly nie hier nie en hul volmagte word opgeraap in verkiesings. Ter selfdertyd besit sommiges verskeie eiendomme en het dus verskeie stemme wettig bekom. Sodoende het die werkers of huurders geen inspraak in hul owerheid nie. By sommige verkiesings kry kandidate meer stemme as die teenwoordige stemgeregdigdes, maar hul val uit. Dit bemagdig dus ‘n klomp mense in Orania nie. Ek maak die stelling dat verskeie inwoners eintlik moed opgegee het om hul standpunte te laat hoor of meer nog ingestem te kry. Orania dra kenmerke van ‘n feodale stelsel of ‘n oligargie. Niks daarvan hou goeie toekomsverwagtinge in vir hierdie plek waarvoor soveel opgeoffer is nie. Laat nuwe inkomelinge maar hul eie sterte prys. Ek sal seker ‘n skoorsoeker bly want ons ideaal is ‘n republiek soos wat Afrikaners ‘n republiek verstaan. Die Afrikaner se vryheidsideaal gaan ontspoor, waarskynlik deur gefrustreerde inwoners of vestigers of trekvoels.

    Reply
    • Johan

      As jy ‘n historiese feodale oligargie (of selfs monargie) wou sien, moes jy in die Transvaal gelewe het post-Groot Trek.

      Ek hou van die stelsel van meriete-gebasseerde stemreg. Ons het mos nou mooi gesien waar oop en ongekwalifiseerde stemreg jou bring, en dit kom eintlik nou maar net neer op ‘n Franse Revolusie-styl gepeupel wat uiting gee aan hulle drange.

      Die ganse Orania-idee is nog so fragiel, en die robuustheid daarvan nog steeds so laag, dat ek dink om die bestuur en besluite aan die hande-arbeiders eerder as die eienaars van die korporasies oor te laat, ‘n blitsige doodskoot vir die ganse idee sou beteken. Orania se bestuur verg ‘n finesse en ‘n visie (jammer, maar visie is raar onder mense – almal dink hulle het dit, maar nope – nie so nie), wat die huidige bestuur alreeds bewys het dat hulle dit besit. Waarom nie eerder aanvaar dat die stelsel vir almal geld, die konserwatiewe en stabiele effek wat dit het aanvaar nie, en vir jouself ‘n plek oopwerk binne hierdie stabiliserende (en uitermate regverdig teenoor beleggers) stelsel nie?

      Afrikaners is Republikeine ja. En wanneer dit ‘n land is instede van ‘n week en klein pas-ontkiemde plantjie, dan kan mens weer politiek-politiek speel.

      Vind jou gewig binne die stelsel deur jou bydrae gewigtig te maak.

      Reply
  14. Jan Joubert

    Nou ja. Ons wil mense trek na Orania. Kom tog Orania toe om deel van die gepeupel te wees. As die weerstand van buite teen Orania oplaai en ons moet hom verdedig moet grondeienaar en gepeupel saam aksie neem. Prof Boshoff het by meer as een geleentheid gese dat die mense wat tot die burgerraad verkies word moet mense wees wat hul lewe vir Orania sal gee. Prof Boshoff kon enige wereldleier te woord staan. Ons het hom dikwels in die son sien arbei. Soggens het hy sy koeie gemelk. Hy kon mense met hom saamvat want sy visie en sy optrede het mekaar nie weerspreek nie. Hy was voortdurend besig om mense te bemagtig. Ons het ‘n volk om saam te vat!

    Reply
  15. Pam Immelman

    Ons wil (DV)oor sowat ‘n maand of twee by Orania aandoen (met ons 2 man) tent. ‘n Mens kan lees oor alles en nog wat, maar die beste bly nog steeds om self te gaan kyk, en dis wat ons wil doen.

    Vriendelike groete,
    Pam en Stan (ons is Ingelse boertjies, of is dit dalk Afrikaanse Rooinekke) 🙂

    Reply
    • Jaco Kleynhans

      Pam,

      Julle is welkom om Orania te besoek. Ons sal julle graag op toer neem en alles van Orania wys. Jy is reg dat dit die beste is om Orania te kom besoek.

      Reply
  16. Willie

    Dag Jaco

    Dit wat jy hier voor hou klink en lyk goed .
    Nou vertel vir my wat het Saterdag gebeur 13 12 2014
    Stuur jou antwoord per Epos

    Reply
  17. Jaco Kleynhans

    Willie,

    Verwys jy na iets in Orania? Ek was in Pretoria vir ‘n troue.

    Reply
  18. Theuns

    Uit die skrywes is dit duidelik dat mense wat nuut vestig, sonder eiendom as huurders, oorgelewer is aan magte en besluite van die “eienaars” van Orania. Dis ‘n wesenlike probleem.
    Dit gee geen erkenning aan huurders/ nuwelinge/ ontmagtigdes wat buiten ‘n dak oor die kop, geen ander bydrae mag maak nie.
    Hul is wel bevoordeel met behuising. Of skep verhuring ‘n afkanklikheid ?
    Dit sal geweldig voordelig wees vir Orania se beeld en toekomstige sukses indien die houding wat in antwoorde gesien word, meer verdraagsaam en minder eng/ aanvallend / afbrekend negatief is. Daar is vele wyses om dieselfde doel te bereik . Daar is nie net een pad na Jerusalem nie….
    Dit vereis aanpasbaarheid om waarlik ‘n suksesvolle “leier” in enige situasie te wees.
    Ek ondersteun Jan, Ludwig en Sebastiaan se oper en meer deelnemende benaderings wat insluitend eerder as uitsluitend is.
    Daars hoop.
    Net as nagedagte- ek is wel ‘n buitelid….

    Reply
    • Jaco Kleynhans

      Beste Theuns,

      Dit is belangrik om te besef dat hierdie ‘n blog is en nie ‘n navraagblad nie. Ons hanteer alle navrae (glo ek) op ‘n professionele wyse. Die blog is egter ‘n debatsforum wat mense mekaar se standpunte kan uitdaag en waar idees getoets kan word.

      Wanneer daar dus op ‘n inskrywing van my skerp (selfs persoonlike) kritiek gelewer word, behoort die persoon wat die kritiek lewer ook gemaklik te wees om self kritiek te ontvang. Jou opmerking (heelbo) dat Orania nie hoop bied vir arm en middelklas Afrikaners nie is ‘n breë onbillikke en ongefundeerde standpunt (my opinie) en dus moet jy gemaklik daarmee wees om kritiek op hierdie standpunt te aanvaar. Dit geld ook vir enigiemand anders wat sodanige kritiek (sonder enige bespreking daarvan!) wil lewer. Jy het ‘n goeie reg om kritiek te lewer en dan moet jy aanvaar om kritiek te ontvang. Dieselfde geld vir mnr Jan Joubert wat ‘n baie persoonlike aanval in sy skrywes geloods het eerder as om (soos sommige ander deelnemers) alternatiewe voorstelle te maak wat werklik die gesprek vorentoe neem.

      Jy maak in jou inskrywings hierbo talle veralgemenings en dit vra vir kritiek. Byvoorbeeld: In jou laaste inskrywing maak jy die gevolgtrekking (afgelei uit een of twee mense se kommentaar) dat nuwe intrekkers wat eiendom huur ‘aan die magte en besluite van eienaars van Orania uitgelewer is’. Dit is is onbewysde standpunt gebaseer op een of twee opmerkings van mense met ander agendas en redes waarom hulle graag sulke kritiek wil lewer. My vraag sou wees: Wat is jou voorstelle? Hoe dink jy moet ons daarmee te werk gaan? Het jy enigsens my antwoorde aan jou oor die Helpsaamfonds en wat daar in Orania vermag word om van die heel armste Afrikaners wat hier opdaag te help? Indien ons oor hierdie punte kan gesels kan daar sinvolle gesprekvoering plaasvind.

      Dankie in elk geval vir jou deelname, vrae, kritiek, ens. Dit word ernstig opgeneem en ek kan jou belowe dat ons by die Orania Beweging voortdurend besig is om met hierdie vraagstukke te worstel.

      Reply
  19. Ebert

    Oom Jan, Ludwig en Theuns,

    Ek wil julle net graag ook wys op die bestaan van die Orania Verteenwoordigende Raad (OVR) wat demokraties verkies word deur alle volwasse inwoners van Orania (insluitend die hoewes) wanneer die munisipale verkiesings plaasvind.

    Die OVR is verandwoordbaar aan enige volwasse inwoner en dien ook as liggaam om sulke inwoners se griewe met die Dorpsraad te hanteer sou dit nodig wees.

    Die ideaal sou natuurlik wees dat die OVR die funksies van die Dorpsraad en van Kambro en van VLU272 oorneem, maar vir solank as wat Orania ‘n privaat dorp is, het slegs laasgenoemde die wettige reg om heffings te hef en in te vorder. Wanneer Orania groot genoeg is om as publieke dorp te funksioneer (insluited om enige aansprake van Thembilihle op munisipale heffings in die howe te verweer), dan sal die huidige knelpunt oor demokratiese insette hersien kan word, maar tot dan moet ons werk binne die wettige raamwerke sonder om onnodige kostes aan te gaan, want dit is tans beter om beskikbare geld vir ontwikkeling aan te wend.

    Laastens moet mens darem ook erken dat dit heelwat beter in Orania gaan met arm mense as op baie ander plekke. Niemand word gedreig met uitsetting bloot omdat hulle onbillike eise van hul werkgewers of landhere weier nie. Niemand word minder vergoed as wat hulle vooraf met hulle werkgewers ooreenkom nie (en verdien in elk geval heelwat meer as die minimum loon wat geld). Niemand word gedwing om onredelike ure sonder vergoeding te werk nie. Geen mensehandel vind plaas nie en niemand word gedwing om hulle tot prostitusie, dwelmhandel of algemene misdaad te wend om ‘n dak oor hul koppe en kos op die tafel te hou nie.

    Maar ongeag bogenoemde is dit belangrik om altyd die lot van ons minder welaf volksgenote te oorweeg en te poog om struikelblokke uit hul paaie te rol, want die gehalte van ‘n beskawing word gemeet aan die wyse waarop sy mense behandel wat nie politieke inspraak het nie. Gemeet hieraan vaar die Weste baie swak, want ongebore babas is seker die mees onderdrukte en uitgebuite groep mense in die ontwikkelde wêreld.

    Reply
    • Ludwig Everson

      Net ‘n vinnige punt.
      “… maar vir solank as wat Orania ‘n privaat dorp is, het slegs laasgenoemde die wettige reg om heffings te hef en in te vorder.”

      Dit is die keuse van die VAB eienaars om nie die VAB akte te verander nie en die Kambro eienaars om nie vrywillige belasting te betaal nie. Ongelukkig is die gewilligheid nie daar nie, ja en al wat dan oorbly is wetgewing, tog so jammer, want nou bly OVR nutteloos, terwyl dit die Orania Metro behoort te wees.

      Die mense het “alles” verloor in die nuwe ZA en is bang hulle gaan weer alles verloor in Orania.

      Reply
      • Ebert

        Ludwig, dalk is daar net nie ‘n sterk genoeg rede vir verandering nie. Die gesegde lui dat mens nie iets moet probeer regmaak wat werk nie. Daar is geen werklike gronde om te beweer dat mense wat nie vir direksielede stem nie, benadeel word nie, want hul beskik oor insae op ander wyse, soos deur die OVR en die Kleingelukkomitee en hul kan net soos enige ander persoon gebruik maak van Orania se regstelsel om hul belange te beskerm.

        Daarmee saam het die Dorpsraad oor dekades heen homself bewys as effektief binne die beperkinge van verouderende infrastruktuur en beperkte hulpbronne.

        Daar is geen empiriese bewyse wat aantoon dat Orania vinniger sal groei of meer volhoubaar sal wees indien hy verander nie.

        Dan moet ook ingedagte gehou word dat dit nie VAB se akte is wat bepaal wie mag stem nie, maar die Maatskappywet wat die vereiste van aandeelhouding stel.

        Reply
  20. Dirk Breytenbach

    Plan A Orania, Plan B Orania!

    Reply

Submit a Comment

Jou e-posadres sal nie gepubliseer word nie.

1 × five =