inlPicsCopy of PN EFF5521Ek kon nie help om die berig op Maroela Media oor die EFF se politieke werwing in Hermanstad met skeptisisme en teleurstelling te lees nie. Skepties is ek oor die hoop wat die gemeenskap het dat daar heil by die EFF te wagte is. Vermoedelik word die EFF gesteun omdat hulle beloftes bied oor grond en behuising. Moontlik uit vrees. Opportunisties gebruik die EFF die geleentheid om te wys dat hulle as party ook wit steun kan kry.

Aan die ander kant is ek teleurgesteld in die sogenaamde vryheid wat die nuwe demokratiese bedeling in Suid-Afrika klaarblyklik bied, maar dat dit in realiteit op marginalisering van minderhede uitloop. Nie net is ek teleurgesteld in die bedeling waarmee ons te doen het nie, maar ook in die wyse waarop daar binne die Afrikaanse gemeenskap ʼn reuse kloof tussen ryk en arm ontstaan het. Terwyl die rykes dit kan regkry om hulself teen die demografiese verskuiwings te verskans, is arm blankes oorgelewer aan ʼn onbarmhartige lot.

Uit my eie ervaring kan ek net ʼn paar probleme noem waarmee arm blankes op ʼn daaglikse basis te doen kry. Meeste van hul kan nie medies bekostig nie en moet van staatshospitale gebruik maak. Taxi’s moet gebruik word vir vervoer. Dwelms en drank is probleme wat gesinne verwoes. Hul moet ook blyplek vind in minder gegoede gebiede, waar misdaadsyfers gewoonlik hoër is. Hul word slagoffers van geweld, diefstal, gesinsverbrokkeling en verwaarlosing deur hul eie mense. Jong kinders loop op straat rond, sonder dat hul ouers iewers opgemerk word. In baie gevalle maak oupa en ouma die kleinkinders groot. Dit is maar net wat ek van binne die veiligheid van my eie motor al opgemerk het.

Vanweë die skeiding tussen arm blankes en ryk blankes ten opsigte van die onderskeie woongebiede, het ons in die reël al hoe minder bewus geword van die nood van mede-Afrikaners. Hoewel daar verskeie organisasie soos Helpende Hand is wat dankbaar hiermee, help is die mees fundamentele probleem dat ryk en arm Afrikaners vandag in verskillende wêrelde leef en byna van mekaar vergeet het.

Die arm blanke vraagstuk gaan nooit volkome opgelos word nie. Die Bybel leer ons dat daar altyd rykes en armes sal wees. Tog meen ek dat ons ʼn verantwoordelikheid het om beter om te sien na mede-Afrikaners wat in armoede verkeer. Hiermee sê ek nie dat ons net ʼn verantwoordelikheid het om na arm Afrikaners om te sien nie, maar wel dat die verantwoordelikheid die swaarste weeg en prioriteit behoort te geniet.

Om behoorlik na mekaar om te sien, is dit nodig om mekaar meer te sien. Dit is nodig dat ryk en arm nie in aparte wêrelde leef nie maar tussen mekaar, sodat die wat meer ontvang die kan help in nood. ʼn Gemeenskaplike grondgebied kan dus ʼn groot stap vorentoe wees. Sou ons nader aan mekaar woon, sal ons ook meer bewus word van mekaar se lyding en ook beter weet hoe om hand by te sit. Hoewel die demokratiese bedeling waarin ons leef vir verskeie individue geweldige voorspoed gebring het, blyk dit nie die geval vir die Afrikanergemeenskap as ʼn geheel te wees nie. Die armblankes in Hermanstad wat die EFF steun is maar net ʼn simptoom hiervan.

Blog Single

EFF se politieke uitbuitery van arm blankes in Hermanstad

by | Jul 5, 2016 | Nuus | 5 comments

5 Comments

  1. Thuunda

    Wat sal die oplossing wees dan, in praktiese terme?

    Reply
  2. Ebert

    My oupa-grootjie het altyd gesê: “‘n Ander se genade is ‘n dekselse genade.”

    Daarmee het hy bedoel dat daar ‘n bepaalde prys te betaal is wanneer jy van ander afhanklik is vir gunste en gawes. Daardie prys sluit in ewigdurende onsekerheid wat uitloop op die vernietiging van eiewaarde, hoop en in erge gevalle die vermoë om outonoom op te tree.

    Hy het geweet waarvan hy gepraat het, want hy het grootgeword in ‘n bywonersgesin, basies onder die sorg van ‘n enkelma terwyl sy pa meestal weg van die huis af was om as transportryer vragte steenkool vanaf die Suid-Oos Transvaal na Botswana en Rhodesië aan te ry.

    Hy is egter aangedryf om self verantwoordelikheid vir sy lot te neem en deur harde werk het hy afgetree as ‘n gesiene boer in die Oos-Vrystaat wat gedien het as direkteur van die landboukoöperasie en voorsitter van die kerkraad.

    Sy ervaring wys ook dat mens nie moet neerkyk op ons arm Afrikaners nie. Daar is potensiaal in hulle (en indien nie in hulle self nie, wel in hulle kinders en kleinkinders) om ‘n nuwe Afrikanerstad te bou. Kyk maar na Australië, waar die arm, kriminele bandiete van 200 jaar gelede ‘n land van vooruitgang gebou het wat vandag een van die mees gesiene in die gemenebes van volke is.

    Dit is ons taak, as ondersteunders van Orania om die Orania Beweging se Helpsaamfonds sodanig uit te bou dat meer behoeftige Afrikaners ‘n geleentheid gebied kan word om vir hulself en vir hul kinders ‘n beter toekoms te skep.

    Reply
  3. Victor Correia

    Goeiedag Thuunda. Ek dink een oplossing is ‘n gemeenskap soos Orania waar ryk en arm op ‘n daaglikse basis met mekaar te doen kry en tussen mekaar woon.

    Reply
  4. magdalena

    Lewe is swaar almaal sukel maar gaan maak n draai in hermanstad gaan praat self met die inwoners en julle al sien dat anc , da , vf , almaal al beloftes gemaak het en sodra die verkiesing verby is hoor jy niks meer van hulle nie ek ken van mense daar van hulle bly al van 1993 af daar in die rdp huise van hulle kry sassa en moet huurbetaal krag en kos op die tafel sit behuising se hulle moet betaal of word op straat gesit. So ook Dinsdag met DA se verkisings vergadering somige van die mense is raad op eff het al meer uit gerig as wat enige van ander belofte partye gese het hulle gaan doen. So kom kyk gerus hoe dit werklik gaan en sien op wit en swart waarvan mense praat voor daar klippe gegooi word. DA lieg so gebruik behuisings mense om hulle vergadering te reel hoe bad moet dit wees as jy nie eers op pappier eerlik kan se dit is n DA vergadering nie julle dink anc is erg wag dat DA in kom dan gaan julle eers sien wat rasisme regtig is eff het teminte probeur waar ander nie wou nie

    Reply
  5. Pieter

    Magdalena, ek het werklik simpatie met die armes van Hermanstad. Ongelukkig is daar geen kitsoplossing vir armoede nie. As jy glo dat die EFF wel ‘n oplossing het en die armblankes op ‘n pad van voorspoed gaan plaas, is jy werklik naïef. Die EFF is baie-praat en min-doen.

    ‘n Lantermynoplossing (slegs een) is om nie meer kinders te hê as wat jy kan bekostig om te voed en VOLDOENDE opleiding te gee. Slegs dan is daar hoegenaamd ‘n kans dat jou negeslag minstens uit die boeie van armoede kan ontsnap.

    Sterkte Magdalena!

    Reply

Submit a Comment

Jou e-posadres sal nie gepubliseer word nie. Verpligte velde word met * aangedui

20 − 14 =