New_cold_war620Toe die Sowjet Unie op 25 Desember 1991 tot ’n einde gekom het, het die wêreld ook geglo dat die Koue Oorlog verby was. Tog sien ons vandag dat die Westerse lande onder die vaandel van die Noord Atlantiese Verdragsorganisasie voortdurend besig is om strategieë te bedink om die opmars van Rusland te probeer stuit.

Vyf en twintig jaar na die val van die Sowjet Unie het Amerika 35 000 soldate wat permanent in Europa en veral die oosgrens naby aan Rusland, gestasioneer is. Die VSA beplan om binnekort tussen 4000 en 5000 ekstra soldate na Oos-Europa te stuur ten einde die bedreiging van Rusland teen te staan.

Sedert die einde van die Koue Oorlog handhaaf die VSA ’n aktiewe militêre teenwoordigheid in Europa. Onder die presidentskap van George W. Bush is ’n komplekse missielafweerstelsel deur die Amerikaners in Pole ontwikkel.

Hoewel die internasionale gemeenskap vermoed het dat Barack Obama die VSA se militêre betrokkenheid in Europa sou afskaal, het die teenoorgestelde eintlik gebeur. In 2014 het Obama die sogenaamde “Europese Gerusstellingsinisiatief” aangekondig. Dié inisiatief is daarop gefokus om Rusland te verhoed om Europese lande, veral die Baltiese State, binne te val. Met die bekendstelling van die inisiatief het Obama 1 miljard dollar vir die inisiatief beskikbaar gestel. Teen volgende jaar sal dit tot 3,4 miljard dollar verhoog.

Waarom is die VSA en Wes-Europese state so bekommerd oor ’n moontlike aggressiewe strategie van Rusland? Eerstens moet ’n mens erken dat Rusland nie onskuldig is nie. Die Russe het reeds in 2008 Georgië binnegeval en beset vandag steeds Suid-Ossetia en Abkhazia, twee van dié land se noordelike provinsies.

Gedurende Maart 2014 het Russiese seperatiste in die Krimgebied, ’n skiereiland aan die noordkus van die Swartsee, met die hulp van die Russiese regering en weermag die gebied as onafhanklik van die Oekraïne verklaar.

Rusland is dus bekend vir ’n aggressiewe benadering aan sy westelike en suidelike grens. Die redes hiervoor is egter duidelik. Die gebiede waar Rusland betrokke geraak het, is almal gebiede met groot Russiese bevolkings wat eerder deel van Rusland wil wees. Tweedens het Rusland betrokke geraak in gebiede waar sy eie weermag bedreig kan word sou hy nie die grondgebied daarom beheer nie. Rusland het ’n belangrike vlootbasis op die Krimskiereiland.

Beide redes vir Rusland se aggressie word gedryf deur lande soos Georgië en die Oekraïne se besluit om minder met Rusland te assosieer en eerder pro-Westerse regerings te verkies. Terwyl hierdie lande wes begin kyk het, het Rusland gevrees dat sy belange daar bedreig kan word.

Die Weste en veral die VSA oorskat die Russiese bedreiging. Rusland het min rede om ander Oos-Europese lande soos Pole en die Baltiese lande binne te val. Rusland se militêre vermoë word ook oorskat. Terwyl die VSA en NAVO egter hul vermoë in Oos-Europa uitbrei, sal Rusland geen ander keuse hê as om dieselfde te doen nie.

Die toenemende of hernude Koue Oorlog tussen die Weste en Rusland is eerder ’n oorsaak van Westerse oordrewe militêre teenwoordigheid as ’n wesenlike bedreiging van Rusland. Indien die Weste te vêr gaan kan dinge binnekort lelik raak in Oos-Europa.

Blog Single

Die Koue Oorlog duur voort

by | Mei 18, 2016 | Nuus | 4 comments

4 Comments

  1. Hollander

    Daar is in Europese media ‘n volwaardige propaganda oorlog teen Rusland. Daar gaan geen dag verby dat Rusland, hetsy indivude afgekraak en verkleineerd word. Byvoorbeeld.. dat Russiese vroue h*ere is. Europese koerante publiseeer NOOIT een interview met Poetin. Die mediaberiggewing is propagandisties net soos hulle berig oor blankes in Suid-Afrika.

    Ek was al 4x in Rusland op (werk)besoek en dit is alles onwaar. Poetin se hard is op die regte plek.

    Russe is enorm gasvry. Hulle is gewoond aan swaarkey en hardwerk. Dit sou byna ons buurvolk kan wees!!

    Reply
  2. Hanno

    A nee a, Jaco. Hierdie artikel is darrem erg eensydig.

    Wat betref die geval in Georgie, het Rusland reaktief opgetree. Georgie het eerste die provinsie van Suid-Ossetia aangeval as gevolg van Etniese konflik in Georgie. Georgie het dit gedoen met die gedagte dat Amerika hom sou steun, maak nie saak wat gebeur nie. Moes Rusland net sit en toekyk? Is Amerika die enigste land met die morele hoegrond om ander lande binne te val?

    In die geval van Oekraine is jou opsomming van die situasie ook nie korrek nie. Die konflik het in die Oekraine self begin. Oekraine is ‘n verdeelde land, met een helfte wat wes kyk, en die ander helfte oos. Dis omdat die pro-Westerse faksie begin het om die pro-Russiese bevolking aan te val, dat Rusland ingegryp het. Krimea is meer as 90% Russies, waarom moet hulle gedwing word om in ‘n land te bly wat hulle vyandig gesind is? Wat betref die vliegtuig wat afgeskiet is in oos-Oekraine, die Russe het oor ‘n halfuur lank ‘n media konferensie gehad met sateliet fotos en Radar opnames wat bewys het die misiel is deur Oekranie afgevuur. Wat het Amerika ons gebied? Slegs die aantuiging dat Rusland verantwoordelik is sonder om ooit enige bewyse te gee?

    Aan die anderkant het die NATO lande Afghanistan, Irak en Libie ingeval, en die lande in ‘n slegter situasie agter gelaat as wat hulle dit gekry het.

    Nee wat, indien enige iemand die koue oorlog aan die gang hou, is dit NATO. Soos Donald Trump tereg sê: NATO is obsoluut – dit is ‘n organisasie wat ontwerp was vir ‘n bedreiging wat nie meer bestaan nie, en wat nie aangepas het by die veranderende politieke landskap nie.

    Reply
    • Jaco Kleynhans

      Hanno. Ek is verstom dat jy Rusland se propaganda soos soetkoek opeet. Ek is glad nie anti-Rusland (jy moet dalk weer lees) maar om die Russe vir die wat in Georgië gebeur het te veronskuldig is onverantwoordelike eensydigheid oor die geskiedenis. Jy sal meer bronne moet raadpleeg. Ek het.

      Reply
  3. melanie

    dis die interessantste stuk wat ek nog ooit gelees het hou so aan…

    Reply

Submit a Comment

Jou e-posadres sal nie gepubliseer word nie. Verpligte velde word met * aangedui

18 + eleven =