Besienswaardighede
Orania is in die eerste plek ʼn Afrikanerdoeldorp. Hierdie instelling van Afrikanerskap waarmee inwoners daagliks leef en wat hulle belangrik ag, het ʼn ryk kulturele gevolg. Alhoewel Orania se blote bestaan alreeds ʼn lewende monument van ʼn poging tot groter selfbeskikking, en daarom ʼn besienswaardigheid is, volg hier ʼn paar besienswaardighede wat besoek móét word deur enige een wat Orania ten volle wil ervaar:
Die Koeksistermonument
Orania se Koeksistermonument is as tong-in-die-kies projek begin, maar het tog ʼn baie ernstige boodskap. Die monument is nie net vir die soethappie wat so eie aan die Afrikaner is nie, maar ook ʼn verering van die Afrikanervrou en die fondse wat deur die jare vir die bou van kerke of skole ingesamel is met die bak van koeksisters by basaars. Die monument is te siene langs die Orania Dorpswembad vir ʼn vinnige ‘selfie’!
Verwoerdgedenkversameling
Kort na die aankoop van Orania het mev Betsie Verwoerd, weduwee van die voormalige eerste minister Hendrik Verwoerd, haar in Orania kom vestig. Mev Verwoerd is selfs deur oud president Nelson Mandela hier besoek. Na haar afsterwe in 2000 is haar voormalige woonhuis omskep in die Orania Verwoerdmuseum. ʼn Deel van die huis is bewaar net soos dit gelyk het in haar leeftyd, terwyl die ander helfte museumstukke uit hulle tyd in die staatsdiens insluit. Dit sluit beelde, besittings, geskenke en selfs die klere wat dr Verwoerd op die dag van sy dood aangehad het, in.
Slegs op afspraak.
Skakel 053 207 0004
Strooibaalhuise
Na ʼn spesiale projek deur Orania se plaaslike argitek het strooibaalkonstruksie tot ʼn volwaardige boumetode in Orania ontwikkel. Strooibale wat deur staalpenne gedruk en gestapel word, word met ogiesdraad oorgetrek en dan gepleister. Die breë mure isoleer uitstekend in Orania se ekstreme klimaat, is 100% brandbestand en bied ʼn estetiese Karooboustyl. Verskeie strooibaalgeboue is in Orania te sien, onder andere in Orania-Oos, Kleingeluk en die ‘Wynhuis’, Orania se drankwinkel.
Monumentekoppie
Die Orania Monumentekoppie of heldetuin vereer staatsmanne uit die Afrikanergeskiedenis, met een van die mooiste uitsigte in Orania. Die halfsirkel van borsbeelde, met die Klein Reus voor in die middel, simboliseer nie net ons ryk verlede wat agter ons lê nie, maar dat vryheid deur eie arbeid voor ons in die toekoms wag. Besoeke tydens sonsopkoms of –ondergang word veral aanbeveel. Gaan drink ʼn koppie koffie op die verlede en die toekoms!
Kultuur-Historiese Museum
Stap deur die gange van die Afrikanergeskiedenis. Die Orania Kultuur-Historiese Museum bied ʼn ervaring van Jan van Riebeeck se aankoms in die Kaap deur die Groot Trek, Boererepublieke, vryheidsoorloë en konsentrasiekampe tot by die Grensoorlog, Rebellie, Republiek- en Uniewording. Kom kyk na die wapens, die gereedskap en vlae waarmee ons voorvaders in Afrika oorleef het.
Die museum is daagliks van 11:00 – 15:00 oop.
Skakel 053 207 0004 vir meer inligting.
Rotsgravures
Orania se ryk geskiedenis word vasgevang op ysterklip! Van Boesmantekeninge tot koopkontrakte uit die 1800’s, van Boerekrygers tot die Engelse ‘Black Watch’ het almal hulle merk hier gelos.
Skakel dr Manie Opperman by 083 225 8199 vir ʼn besigtigingstoer
Oewer
Die Oranjerivieroewer is ʼn oase in die dorre Karoo. Hier kan besoekers en inwoners alles van kampeerplek en die Oewerrestaurant tot die Orania Rivier Spa en visvangplek vind.
Ierse Monument
Tydens die Anglo-Boereoorlog het Ierse vrywilligers die Boere kom bystaan in die stryd teen koloniale Engeland. Baie Iere het hier hulle laaste asems uitgeblaas en so met hulle bloed ons geskiedenis help skryf. Die Ierse Monument is in 1976 in Brixton, Johannesburg onthul waar dit in 2002 afgebreek is om plek te maak vir kommersiële ontwikkeling. Die Vryheidsfront Plus en Orania het saamgewerk om dit ʼn nuwe tuiste in Orania te gee waar dit vandag steeds staan en onderhou word. Besoek gerus hierdie monument op die Orania Monumentekoppie en vereer hierdie Ierse helde.
Aardskip
Die Aardskip is ʼn energie-doeltreffende, munisipaal-onafhanklike, selfversorgende ‘groen’-woonhuis. Die huis wat deur ʼn Orania-ingenieur en sy familie gebou is deur herwinde materiaal, gebruik en hergebruik hulpbronne op ʼn slim manier om sodoende selfversorgend te wees. Reënwater, sonkrag en doeltreffende temperatuurbestuur maak van hierdie huis ʼn onafhanklike eenheid.
Skakel 073 134 9671 vir ʼn besoek
Kaalvoettrappies
Die Kaalvoetvroue van Orania (met verwysing na die Voortrekkervroue wat bereid was om ‘Kaalvoet oor die Drakensberge te gaan’) pak verskeie projekte aan om Orania te verfraai. Die Kaalvoettrap wat twee dele van Orania verbind is ʼn voorbeeld van so ʼn projek. Die trap is met mosaïekteëls versier om ʼn simboliese beeld te skep. Die kunstenaar, mev Cornelia Holm, het Oraniërs se afhanklikheid van ons Skepper, die landbousektor, seisoene en die omgewing uitgebeeld met ʼn baie sterk Orania boodskap. Aan die een kant van die trap is daar ʼn tydlyn wat Orania se geskiedenis op teëls uitbeeld, aan die ander ʼn kanaal waar fietsryers hulle fietse kan op- of af stoot. Die trappe het ook ʼn gewel wat in feestye oranje versier word